දැනට පස්වන වසරටත් ඇදී යන යුක්රේන යුද්ධය අවසන් වීමට ආසන්න බවට රුසියානු ජනාධිපති ව්ලැඩිමීර් පුටින් පසුගිය සෙනසුරාදා කළ ප්රකාශය ක්රෙම්ලිනය අද (12) යළිත් තහවුරු කර තිබේ. යුද්ධය අවසන් කිරීමේ අභිලාෂයක් රුසියාවට නොමැති බවට යුක්රේන ජනාධිපති වොලොඩිමීර් සෙලෙන්ස්කි චෝදනා කිරීමෙන් පසුව ක්රෙම්ලිනය මෙම පැහැදිලි කිරීම සිදු කර ඇත.
සාම ගිවිසුමක් සඳහා යුක්රේනය සහ ඇමෙරිකා එක්සත් ජනපදය සමඟ ත්රෛපාර්ශ්වික මට්ටමින් යම් පදනමක් සකස් වී ඇති බවත්, ඒ අනුව ගැටුම නිමාවීමට ආසන්න බව පැවසිය හැකි බවත් ක්රෙම්ලින් ප්රකාශක දිමිත්රි පෙස්කොව් සඳහන් කළේය. කෙසේ වෙතත්, මේ සම්බන්ධයෙන් නිශ්චිත තොරතුරු සැපයීම දැනට අපහසු බව ද ඔහු වැඩිදුරටත් පවසා තිබේ.
මේ අතර, යුක්රේන ජනාධිපති සෙලෙන්ස්කි සඳහන් කර ඇත්තේ රුසියාව නව ප්රහාර සඳහා සූදානම් වෙමින් සිටින බවත්, යුද්ධය අවසන් කිරීමේ සැබෑ අභිලාෂයක් ඔවුන් සතු නොවන බවත්ය. යුද්ධය නැවැත්වීමට ඇමෙරිකානු ජනාධිපති ඩොනල්ඩ් ට්රම්ප් විසින් සාකච්ඡා වට කිහිපයක් පවත්වා ඇතත්, මෙතෙක් ස්ථිර සාම ගිවිසුමකට එළඹීමට දෙපාර්ශ්වයම සමත්ව නොමැත. රුසියාව දැනට යුක්රේනයේ භූමියෙන් පහෙන් එකක පමණ ප්රමාණයක් අත්පත් කරගෙන සිටින අතර, යුද්ධය අවසන් කිරීම සඳහා යුක්රේනය තවත් භූමි ප්රදේශ රුසියාවට පවරා දිය යුතු බව මොස්කව් පාලනය අවධාරණය කරයි.
