මත්ද්රව්ය හා බැඳුණු විනාශකාරී දොරටුව වසා දැමීම සඳහා තරුණ පරපුර තුළ ආගමික ප්රබෝධයක් ඇති කිරීම අත්යවශ්ය බවත්, එම කාර්යයේදී මහා සංඝරත්නය ප්රමුඛ ආගමික නායකයන්ට ප්රමුඛ කාර්යභාරයක් පැවරෙන බවත් ජනාධිපති අනුර කුමාර දිසානායක මහතා ප්රකාශ කළේය.
ජනාධිපතිවරයා මේ බව සඳහන් කළේ නිකවැරටිය ගනේවැව පුරාණ විහාරස්ථානයේ පැවති 2026 වෛශාඛ්ය මංගල්යයට අද (29) පෙරවරුවේ එක් වෙමිනි.
සමාජයීය සහ දේශපාලනික පසුබිම පිළිබඳව අදහස් දක්වමින් ජනාධිපතිවරයා පෙන්වා දුන්නේ ලංකා ඉතිහාසයේ පළමු වතාවට මත්ද්රව්ය ජාවාරම සහ අපරාධ සඳහා තිබූ දේශපාලන බලය බිඳ දමා ඇති බවයි. මත්ද්රව්ය ජාවාරම්කරුවන්ට හෝ අපරාධකරුවන්ට අද වන විට දේශපාලන අනුග්රහය නොලැබෙන බවත්, නීතිය හා රාජ්ය බලය යොදා ගනිමින් එම විනාශකාරී දොරටු වසා දැමීමට රජය දැඩි කැපවීමකින් කටයුතු කරන බවත් ඔහු අවධාරණය කළේය.
කෙසේ වෙතත්, මෙය නීතියෙන් පමණක් කළ නොහැකි බවත්, තරුණ පරපුරේ සිත් සතන් වෙනස් කරමින් ඔවුන් යහපත් මාවතකට යොමු කිරීමට අධ්යාත්මික පරිවර්තනයක් අවශ්ය බවත් ජනාධිපතිවරයා වැඩිදුරටත් සඳහන් කළේය. මේ සඳහා පූජ්ය කත්නෝරුවේ සිරිධම්ම ස්වාමීන් වහන්සේ වැනි තරුණ භික්ෂූන් වහන්සේලා විසින් ඉටු කරනු ලබන ශාසනික සහ සමාජයීය මෙහෙවර ඔහු විශේෂයෙන් ඇගයීමට ලක් කළේය.
වත්මන් සමාජයට නව හර පද්ධතියක් සහ වටිනාකම් පද්ධතියක් හඳුන්වා දිය යුතු බව පෙන්වා දුන් ජනාධිපතිවරයා, සියලු සංස්කෘතීන් සහ අනන්යතාවලට ගරු කරන, සහකම්පනයෙන් යුත් සමාජයක් ගොඩනැගීමේ වැදගත්කම අවධාරණය කළේය.
මෙම උත්සවයට සමගාමීව, විචිත්ර ධර්ම කථික, ශාස්ත්රපති පුජ්යපාද කත්නෝරුවේ සිරිධම්ම හිමිපාණන් වහන්සේගේ ධර්ම දේශනා ඇසුරින් සකස් කළ “දිවි මං සදහම්” කෘතිය සහ විහාරස්ථානයේ නවතම පරිගණක යෙදුම එළිදැක්වීම ද සිදු කෙරුණි. තවද, ගනේවැව පුරාණ විහාරස්ථානයේ අභිනව ධර්මශාලාව, බෝධිඝරය, ඝණ්ඨාර කුලුන සහ දාන ශාලාව විවෘත කිරීමද ජනාධිපතිවරයාගේ ප්රධානත්වයෙන් සිදු විය.
මෙම අවස්ථාව සඳහා රාමඤ්ඤ මහා නිකායේ මහානායක අතිපූජ්ය මකුලෑවේ විමල නායක හිමිපාණන් වහන්සේ ප්රමුඛ මහා සංඝරත්නය, මැති ඇමතිවරුන්, ආදි වාසී නායක වන්නිලැ ඇත්තෝ සහ ප්රදේශයේ ජනතාව විශාල පිරිසක් සහභාගී වූහ.
