ශ්රී ලංකාවේ සිදුවූ කිසිදු අපරාධයක් කාලයේ වැලිතලාවෙන් යටපත් වීමට ඉඩ නොතබන බවත්, දේශපාලන බලය හෝ වෙනත් ඕනෑම බලපෑමක් නොතකා අපරාධකරුවන් නීතිය හමුවට ගෙන එන බවත් ජනාධිපති අනුර කුමාර දිසානායක මහතා අවධාරණය කරයි. ඔහු මේ බව ප්රකාශ කළේ ඊයේ (25) පාර්ලිමේන්තුවේදී විෂ මත්ද්රව්ය උවදුර සහ සංවිධානාත්මක අපරාධ මැඬලීම පිළිබඳ විවාදයට එක්වෙමිනි.
මත්ද්රව්ය ජාවාරම්කරුවන් සහ සංවිධානාත්මක අපරාධ කල්ලි යනු හුදෙක් පුද්ගලයන් පිරිසක් නොව, දේශපාලන අධිකාරිය සහ රාජ්ය ආයතන තුළ ගැඹුරින් මුල් බැසගත් සබඳතා ජාලයක් බව ජනාධිපතිවරයා පෙන්වා දුන්නේය. මෙම ජාලය මුලිනුපුටා දැමීම රජයේ මූලික අරමුණ බව ඔහු පැවසීය.
හමුදාව සහ බුද්ධි අංශ පිළිබඳ ගෞරවය ආරක්ෂා කරමින්ම, රාජ්යයේ හෝ යම් පවුලක බලය තහවුරු කිරීම සඳහා ම්ලේච්ඡ ඝාතන සහ අපරාධ සිදුකළ කුඩා කණ්ඩායම් හඳුනාගෙන ඔවුන්ට දඬුවම් දීමට රජය පසුබට නොවන බව ජනාධිපතිවරයා අවධාරණය කළේය. ලසන්ත වික්රමතුංග ඝාතනය, තාජුඩීන් ඝාතනය සහ පාස්කු ප්රහාරය වැනි සිද්ධීන් මෙයට නිදසුන් ලෙස ඔහු පෙන්වා දුන්නේය.
අපරාධ විමර්ශන සඳහා නායකත්වය ලබාදෙන ශානි අබේසේකර, රංග දිසානායක, රවී සෙනෙවිරත්න, දිලීප පිරිස් ඇතුළු නිලධාරීන්ට එල්ල වන ප්රහාර සහ තර්ජන පිළිබඳව අදහස් දක්වමින් ජනාධිපතිවරයා කියා සිටියේ, අයුක්තියට එරෙහිව සත්ය හෙළිදරව් කරන නිලධාරීන් ආරක්ෂා කිරීමට රජය බැඳී සිටින බවයි.
ත්රස්තවාදය වැළැක්වීමේ පනත (PTA) අහෝසි කර, සංවිධානාත්මක අපරාධ මැඬලීම සඳහා වඩාත් පැහැදිලි නිර්වචනයක් සහිත නව නීතියක් හඳුන්වා දෙන බවත්, Online Safety පනත සංශෝධනය කරන බවත් ඔහු සහතික කළේය.
භීතියෙන් සහ බියෙන් ජීවත් වන සමාජයක් වෙනුවට, පාලකයා ප්රශ්න කිරීමට සහ විවේචනය කිරීමට නිදහස ඇති, ප්රජාතන්ත්රවාදී අයිතීන් සුරකින ශිෂ්ටසම්පන්න සමාජයක් ගොඩනැගීම තම අරමුණ බව ජනාධිපතිවරයා වැඩිදුරටත් කියා සිටියේය.
බන්ධනාගාර තුළ සිට සිදුවන අපරාධ මෙහෙයුම් වැළැක්වීම සඳහා වැලිසර නව බන්ධනාගාර පද්ධතියක් ස්ථාපිත කර ඇති බවත්, මත්ද්රව්ය ජාවාරම සහ සංවිධානාත්මක අපරාධ මුළුමනින්ම ශ්රී ලංකාවෙන් තුරන් කරන බවත් ජනාධිපතිවරයා එහිදී අවධාරණය කළේය.
