අවස්ථාවාදී බලලෝභී දේශපාලකයන්ගේ අන්තවාදී න්යාය පත්ර නිසා එකම රටක මිනිසුන් බෙදා වෙන් කළ අතීතය නිමා කර, නැවත කිසිදිනෙක මෙරට තුළ යුද්ධයක් ඇති වීමට ඉඩ නොතබන බව ජනාධිපති අනුර කුමාර දිසානායක මහතා අවධාරණය කරයි.
ජනාධිපතිවරයා මේ බව සඳහන් කළේ අද (19) පස්වරුවේ බත්තරමුල්ල රණවිරු ස්මාරකය අබියස අභිමානවත්ව පැවැත්වුණු 17 වැනි ජාතික රණවිරු දින සැමරුම් උත්සවයේ ප්රධාන ආරාධිතයා ලෙස අමතමිනි. රණවිරු සේවා අධිකාරිය විසින් සංවිධානය කරන ලද මෙවර සැමරුම සඳහා ඉතිහාසයේ පළමුවරට රණවිරු පවුල්වල සාමාජිකයන් විශාල පිරිසකට සෘජුව සහභාගී වීමට ඉඩකඩ සලසා දී තිබීම සුවිශේෂී සිදුවීමක් විය.
රණවිරුවන් දිවි පිදුවේ සහ ශරීර අවයව පරිත්යාග කළේ යුද්ධයෙන් තොර සාමකාමී, සංවර්ධිත සහ සර්ව සාධාරණ රටක් වෙනුවෙන් බවත්, ඔවුන් මරණාසන්නයේ ප්රාර්ථනා කළ ඒ අනාගතය නිර්මාණය කිරීමේ වගකීම වත්මන් රජය කොන්දේසි විරහිතව භාරගන්නා බවත් ජනාධිපතිවරයා පැවසීය. වෛරය සහ ක්රෝධය වපුරන පැරණි විනාශකාරී මාවත වෙනුවට රට සමගිය, සංවර්ධනය සහ සමෘද්ධිය කරා ගෙන යන නව මානවවාදී මාවතක් වත්මන් රජය තෝරාගෙන ඇති බව ද ඔහු සඳහන් කළේය.
ලේ ගංගා සහ බෝම්බ උණ්ඩ මත මතු පරපුරට සැනසිලිදායක රටක් ඉතිරි නොවන බව ප්රකාශ කළ ජනාධිපතිවරයා, ශ්රී ලංකාව යළි කිසිසේත්ම කවර හෝ ජාතිවාදී හෝ අන්තවාදී කණ්ඩායමක ගොදුරක් වීමට ඉඩ නොදෙන බවට ස්මාරකය ඉදිරිපිටදී සහතික විය.
දශක ගණනාවක සන්නද්ධ යුද්ධය නිමා කර ඇති අප, දැන් රටක් ලෙස වෙලාගෙන ඇති ආර්ථික යුද්ධය, විරැකියාවේ යුද්ධය සහ දරු පරපුරට විශිෂ්ට රටක් අත්කර දීමේ යුද්ධය එක්ව ජයගත යුතු බව ද ජනාධිපති අනුර කුමාර දිසානායක මහතා වැඩිදුරටත් අවධාරණය කළේය.
