පාසල තුළ යහපත් මනෝ සමාජීය පරිසරයක් නිර්මාණය කරමින්, දරුවන්ට ආදරය සහ රැකවරණය උපරිමයෙන් ලැබෙන විශ්වාසදායක ස්ථානයක් බවට පාසල පත් කිරීම සිය රජයේ ප්රධාන අරමුණක් බව අග්රාමාත්ය ආචාර්ය හරිනි අමරසූරිය පවසයි. ඊයේ (20) පැවැති ශිෂ්ය උපදේශන සහ වෘත්තීය මාර්ගෝපදේශ ඒකක (C2 Centers) පිහිටුවීමේ ජාතික වැඩසටහනේ සමාරම්භක උත්සවයට එක්වෙමින් අග්රාමාත්යවරිය මේ බව අවධාරණය කළාය. අධ්යාපන පද්ධතියේ සිටින සියලුම නිලධාරීන් දරුවන් වෙනුවෙන් එවැනි ආරක්ෂිත පරිසරයක් ගොඩනැගීමට වගකීමෙන් බැඳී සිටින බවද ඇය මෙහිදී ප්රකාශ කළාය.
අධ්යාපන අමාත්යාංශය සහ ‘රූම් ටු රීඩ් ශ්රී ලංකා’ (Room to Read, Sri Lanka) ආයතනය එක්ව සංවිධානය කළ මෙම වැඩසටහනේදී ශිෂ්ය උපදේශන සහ වෘත්තීය මාර්ගෝපදේශන සංග්රහයද එළිදැක්විණි. මීට අමතරව උපදේශන ගුරුවරුන්ගේ වෘත්තීය දැනුම නංවාලීම සඳහා ධාරිතා සංවර්ධන මොඩියුලයක් සහ 21 වන සියවසට ගැළපෙන නිපුණතා අධ්යයන මොඩියුලයක්ද හඳුන්වා දීමට කටයුතු කර තිබේ. දරුවන් විවිධ ගැටලුවලට පෙලඹීම වැළැක්වීම සඳහා අවශ්ය ක්රියාකාරකම් සහ ඒ සඳහා දෙමාපිය සහයෝගීතාව ලබාගන්නා ආකාරය පිළිබඳවද මෙහිදී විශේෂ අවධානයක් යොමු කර ඇත.
අධ්යාපනය මගින් සමාජය වෙනස් කරන යහපත් පුරවැසියන් බිහි කළ යුතු බවත්, ඒ සඳහා අවශ්ය සුරක්ෂිත පරිසරය පාසල් තුළ නිර්මාණය කිරීමට රජය වගකීම භාරගන්නා බවත් අග්රාමාත්යවරිය වැඩිදුරටත් සඳහන් කළාය. මෙම නව වැඩසටහන හරහා සිසුන්ට වඩාත් ආරක්ෂිත ලෝකයක් තුළ තම අනාගත සිහින කරා යාමට මං පෙත් විවර වනු ඇතැයි ඇය විශ්වාසය පළ කළාය. මෙම අවස්ථාවට අධ්යාපන අමාත්යාංශයේ ලේකම් නාලක කළුවැව මහතා ඇතුළු අධ්යාපන බලධාරීන් සහ සිසු දරුවන් විශාල පිරිසක් සහභාගී වී සිටියහ.
