සැබෑ නායකත්වය යනු තනතුරු හෝ බලය මගින් මනිනු ලබන දෙයක් නොව, වගකීමෙන් කටයුතු කිරීම, කරුණාව දැක්වීම සහ අන් අයගේ යහපැවැත්ම උදෙසා කැපවීම බව අග්රාමාත්ය ආචාර්ය හරිනි අමරසූරිය මහත්මිය පවසයි.
කොළඹ අරලියගහ මන්දිරයේදී පැවැති ශ්රී ලංකා බාලිකා මඟපෙන්වන්නියන්ගේ සංගමයේ ජනාධිපති මඟපෙන්වන්නියන්ගේ සම්මාන සහ අග්රාමාත්යවරියගේ සම්මාන උළෙලට එක්වෙමින් අග්රාමාත්යවරිය මේ බව ප්රකාශ කළාය. මෙම උත්සවයේදී සම්මානලාභීන් වෙත පදක්කම් සහ සහතික පත් ප්රදානය කළ අතර, මෙවර ජනාධිපති මඟපෙන්වන්නියන්ගේ සම්මාන 338ක් සහ අග්රාමාත්යවරියගේ සම්මාන 12ක් ඇතුළුව සම්මාන 350ක් පිරිනැමිණි.
අග්රාමාත්යවරිය එහිදී අවධාරණය කළේ තනතුරු හෝ බලයට වඩා වගකීමෙන් යුතුව, අන් අයගේ යහපැවැත්ම උදෙසා කටයුතු කිරීම සැබෑ නායකත්වයේ ලක්ෂණය බවයි. පසුගිය කාලයේ කාන්තාවන්ට අවස්ථා සීමිත වුවද, අද වන විට බාලිකාවන්ට සහ තරුණියන්ට සියලු ක්ෂේත්ර ඔස්සේ ඉදිරියට යාමට වැඩි අවස්ථා උදාවෙමින් පවතින බව ඇය පැවසුවාය. සෑම බාලිකාවකටම සහ තරුණියකටම තමන්ගේ කුසලතා සහ හැකියාවන් වර්ධනය කර ගැනීමට සමාන අවස්ථා හිමි විය යුතු බවත්, රටේ අනාගතය ගොඩනැගීමට දායක විය හැකි නව කාන්තා නායිකාවන් පරම්පරාවක් ශ්රී ලංකාවට අවශ්ය බවත් අග්රාමාත්යවරිය සඳහන් කළාය.
රටේ ආර්ථික සහ ප්රජාතන්ත්රවාදී ප්රතිසංස්කරණ සිදු කෙරෙන අතරතුර, ආර්ථික වර්ධනයට සමගාමීව ශක්තිමත් සදාචාරාත්මක වටිනාකම් සහ සමාජ වගකීමක් වර්ධනය කර ගැනීමේ වැදගත්කම ද ඇය අවධාරණය කළාය. වගකීම් සහිත, දක්ෂ සහ සමාජය පිළිබඳ අවබෝධයක් ඇති තරුණ පුරවැසියන් බිහි කිරීම සඳහා ශ්රී ලංකා බාලිකා මඟපෙන්වන්නියන්ගේ සංගමය ඉටු කරන දායකත්වය අග්රාමාත්යවරිය මෙහිදී විශේෂයෙන් අගය කළාය.
