ගත වූ පැය කිහිපය තුළ බොරැල්ල නව මැගසින්, කුරුවිට සහ මීගමුව පල්ලන්සේන යන බන්ධනාගාර තුනම නොසන්සුන්තාවට පත්වීම මේ වනවිට රටේ දැඩි කතාබහකට ලක්ව තිබේ. ඊයේ (අගෝස්තු 06) රාත්රියේ බොරැල්ල නව මැගසින් බන්ධනාගාරයෙන් ඇරඹුණු මෙම සිදුවීම් මාලාව පසුව කුරුවිට බන්ධනාගාරය දක්වාත්, අද දිනයේදී මීගමුව පල්ලන්සේන බන්ධනාගාරය දක්වාත් පැතිර ගියේය. තත්ත්වය පාලනය කිරීම සඳහා බන්ධනාගාර නිලධාරීන්ට අමතරව පොලීසිය, පොලිස් විශේෂ කාර්ය බළකාය සහ යුද හමුදා සාමාජිකයින්ගේද සහාය මේ වන විට ලබාගෙන ඇති අතර, සිදුවූ නොසන්සුන්තාවලින් රැඳවියන් කිහිපදෙනෙකු ජීවිතක්ෂයට පත්ව තවත් පිරිසක් තුවාල ලබා රෝහල්ගත කර ඇත.
සිදුවීම් මාලාවේ පළමු උණුසුම වාර්තා වූයේ බොරැල්ල නව මැගසින් බන්ධනාගාරයෙනි. රාත්රී 10.20ට පමණ එහි ‘E’ වාට්ටුවේ රඳවා සිටි රැඳවියන් පිරිසක් හදිසියේ වාට්ටුවෙන් පිටතට පැමිණ කලහකාරී ලෙස හැසිරීමත් සමඟ නොසන්සුන්තාව ආරම්භ වී තිබිණි. වාර්තා වන ආකාරයට ගැටුමට මුල් වී ඇත්තේ බන්ධනාගාර තාප්පයට ඉහළින් පිටත සිට ඇතුළට විසි කළ පාර්සලයක් බන්ධනාගාර නිලධාරියෙකු විසින් සිය භාරයට ගැනීමය. එම සිදුවීමෙන් පසු මෙම නොසන්සුන්තාව ආරම්භ වී ඇති අතර එහිදී සිරමැදිරියක අගුළු කඩා රැඳවියන් 40කට අධික පිරිසක් පිටතට පැමිණ තිබූ බවද වාර්තා විය.
අනතුරුව බන්ධනාගාර නිලධාරීන්, පොලීසිය සහ පොලිස් විශේෂ කාර්ය බළකාය එක්ව තත්ත්වය පාලනය කිරීමට මැදිහත් වූ අතර රැඳවියන් යළි සිරකුටි වෙත යොමු කිරීමට පියවර ගැනිණි. බන්ධනාගාර පරිශ්රයේ සහ ඒ අවට ආරක්ෂාව තහවුරු කිරීම සඳහා යුද හමුදා සාමාජිකයින් ද යොදවා තිබූ අතර, තත්ත්වය නිරීක්ෂණය කිරීම සඳහා ගුවන් හමුදා ඩ්රෝන යානාද යොදා ගැනීමට පියවර ගැනුණි.
මැගසින් බන්ධනාගාරයේ ඇති වූ මෙම නොසන්සුන්තාවෙන් රැඳවියන් 11 දෙනෙකු තුවාල ලබා රෝහල්ගත කිරීමට පියවර ගෙන තිබූ අතර, ඔවුන් අතරින් එක් රැඳවියෙකු අද (07) ජීවිතක්ෂයට පත්ව ඇති බව වාර්තා විය. බන්ධනාගාර මාධ්ය ප්රකාශක ඒ.සී. ගජනායක මහතා සඳහන් කළේ බන්ධනාගාරයේ තත්ත්වය මේ වනවිට පාලනය කිරීමට පියවර ගෙන ඇති බවය. කෙසේ වෙතත්, සිද්ධියෙන් පසු රැඳවියන් නවදෙනෙකු වෙනත් බන්ධනාගාර වෙත මාරු කිරීමටද බන්ධනාගාර දෙපාර්තමේන්තුව පියවර ගෙන තිබේ. එමෙන්ම පවතින ආරක්ෂක තත්ත්වය සැලකිල්ලට ගනිමින් අද දිනයේ මැගසින් බන්ධනාගාරයේ රැඳවියන් බැලීමට අමුත්තන්ට අවස්ථාව ලබා නොදීමටද බන්ධනාගාර අධිකාරීවරයා තීරණය කර ඇත.
