මහජන ආරක්ෂාව තහවුරු කිරීම, නීති විරෝධී ක්‍රියා මැඩපැවැත්වීම සහ පොලිස් සේවයේ කාර්යක්ෂමතාව ඉහළ නැංවීම සම්බන්ධයෙන් මහජන ආරක්ෂක සහ පාර්ලිමේන්තු කටයුතු පිළිබඳ අමාත්‍යාංශයීය උපදේශක කාරක සභාවේ විශේෂ අවධානය යොමු වී තිබේ. ඒ, කාරක සභාවේ සභාපති, අමාත්‍ය ආනන්ද විජේපාල මහතාගේ ප්‍රධානත්වයෙන් පසුගිය 21 වැනිදා පාර්ලිමේන්තුවේදී පැවති රැස්වීමේදීය.
සයිබර් අපරාධ, නීති විරෝධී මාර්ගගත (online) සූදු ක්‍රියාකාරකම් සහ මූල්‍ය වංචාවන් මැඩලීම සඳහා පොලිසිය ගෙන ඇති ක්‍රියාමාර්ග පිළිබඳව මෙහිදී දීර්ඝ වශයෙන් සාකච්ඡා කර ඇති අතර, නීති විරෝධී සූදු සහ අනෙකුත් නීති විරෝධී ක්‍රියාකාරකම්වලට සම්බන්ධ වෙබ් අඩවි අවහිර කිරීමට පියවර ගෙන ඇති බව නිලධාරීන් සඳහන් කර ඇත. මෙරට රැඳී සිටිමින් සයිබර් අපරාධවල නිරත වූ විදේශිකයන් සම්බන්ධයෙන් අදාළ රටවල තානාපති කාර්යාල සමඟ සම්බන්ධීකරණයෙන් නීතිමය පියවර ගනිමින් ඔවුන් පිටුවහල් කිරීමට කටයුතු කර ඇති බවද අනාවරණය වී තිබේ.
සයිබර් අපරාධ විමර්ශන කටයුතු වඩාත් කාර්යක්ෂම කිරීම සඳහා මෘදුකාංග ඉංජිනේරුවන් සහ නීතිඥවරුන් බඳවා ගනිමින් මානව සම්පත ශක්තිමත් කර ඇති අතර, අදාළ නිලධාරීන් සඳහා අවශ්‍ය ක්ෂේත්‍ර පුහුණුව මෙන්ම විදේශීය පුහුණුවීම් ලබාදීමටද කටයුතු කරමින් පවතී. ක්‍රිප්ටෝ මුදල් භාවිතය ආශ්‍රිත අපරාධ සම්බන්ධයෙන් විදේශීය ආයතන සමඟ දත්ත හුවමාරු කර ගැනීමේදී පවතින බාධා අවම කිරීමට සම්බන්ධීකරණ කටයුතු සිදු කරන බවත්, කාලීනව ක්‍රියාත්මක කළ හැකි මධ්‍යගත පද්ධතියක් ස්ථාපිත කිරීමේ අවශ්‍යතාව පිළිබඳවත් මෙහිදී අවධානය යොමු වී ඇත.
