වනවාසල ප්රදේශයේ සිදුවූ දුම්රිය පීලි පැනීමේ අනතුර දුම්රිය මාර්ගයේ කොටස් ගැලවීම නිසා සිදුවූ කඩාකප්පල්කාරී ක්රියාවක් බව පොලිස් පරීක්ෂණවලින් තහවුරු වී තිබියදී, ඇතැම් පටු වෘත්තීය සමිති යටි අරමුණු සහිතව කටයුතු කරමින් සිටින බව සමස්ත ලංකා දුම්රිය ස්ථානාධිපතිවරුන්ගේ සංගමයේ සභාපති ජේ.ඒ.පී.එස්. ප්රදීප් ජයසූරිය මහතා පවසයි. වනවාසල දුම්රිය අනතුර සහ දුම්රිය දෙපාර්තමේන්තුවේ වත්මන් ප්රගතිය පිළිබඳව දැනුවත් කිරීම සඳහා පැවැත්වුණු විශේෂ මාධ්ය හමුවකට එක්වෙමින් උන්වහන්සේ ඇතුළු නිලධාරී මණ්ඩලය මේ බව ප්රකාශ කළහ. මෙම මාධ්ය හමුව සඳහා සංගමයේ ලේකම් යූ.කේ. ජයවර්ධන සහ උප සභාපති ඒ.ඒ.සී.කේ. ඝෝෂිත යන මහත්වරු ද සහභාගී වී සිටියහ.
මෙහිදී අදහස් දැක්වූ සභාපතිවරයා, අනතුර සිදු වූ අවස්ථාවේ සිට අව් වැසි නොතකා මහත් පරිශ්රමයකින් යුතුව නුවර පාර දුම්රිය මාර්ගය යථා තත්ත්වයට පත් කිරීමට වෙහෙසෙන දුම්රිය සේවකයන්ව අගය කරනු වෙනුවට ඔවුන්ව හෙළා දැකීමට ඇතැම් පාර්ශව කටයුතු කිරීම තරයේ හෙළා දකින බව පැවසීය. එමෙන්ම, මෙම අනතුර සිදුවූ සැනින් එක්තරා දුම්රිය රියදුරු සංගමයක් විසින් වහාම ප්රකාශයක් නිකුත් කිරීම පිළිබඳව දැඩි සැකයක් මතුවන බව ද ඔහු සඳහන් කළේය. “සිද්ධිය වෙලා සුළු මොහොතකින් ප්රකාශ නිකුත් කරන්න ඒ රියදුරු සංගමයට තිබුණු හදිස්සිය මොකක්ද? මේ හැම දෙයකින්ම බලන්නේ වත්මන් රජය අපහසුතාවයට ලක් කරන්නයි. වනවාසල පීලිපැනීම එක් පුද්ගලයෙකු කළ සොරකමක් වුව ද, මේ පිටුපස සංවිධානාත්මක දේශපාලන කඩාකප්පල් ක්රියාවක් තිබේදැයි පුළුල් පරීක්ෂණයක් පවත්වන්න කියා අපි රජයෙන් ඉල්ලා සිටිනවා” යැයි පවසමින් වෘත්තීය සමිති දේශපාලන අරමුණුවලින් බැහැරව වගකීමෙන් කටයුතු කළ යුතු බව ඔහු අවධාරණය කළේය.
