රත්නපුර, හිදැල්ලන ප්රදේශයේ මැණික් ව්යාපාරිකයෙකුගේ නිවසකට ඇතුළු වී රුපියල් කෝටි හතහමාරක පමණ වටිනාකමකින් යුතු මැණික් සහ රන්භාණ්ඩ කොල්ලකෑ සැකකරු, කොල්ලය සිදුවී පැය 24ක් ගතවීමටත් පෙර අත්අඩංගුවට ගැනීමට රත්නපුර පොලීසියේ අපරාධ විමර්ශන අංශය සමත්ව තිබේ. කුරුවිට, වැලිහිඳ ප්රදේශයේදී පෙරේදා (12) මෙම සැකකරු අත්අඩංගුවට ගෙන ඇත.
පසුගිය 11 වැනිදා අලුයම් කාලයේදී, මැණික් ව්යාපාරිකයා නිවසේ නොසිටි අවස්ථාවක නිවසට ඇතුළු වූ කොල්ලකරු, උල් ආයුධ පෙන්වා ව්යාපාරිකයාගේ මව සහ දියණිය බියගන්වා මෙම කොල්ලය සිදු කර තිබුණි. එහිදී රුපියල් කෝටි 7ක් වටිනා මැණික් ගල්, ලක්ෂ 20ක රන් භාණ්ඩ සහ රුපියල් එක්ලක්ෂ අනූ පන්දහසක මුදලක් කොල්ලකා ගෙන ගොස් තිබූ බව පොලීසිය පවසයි.
ව්යාපාරිකයා කළ පැමිණිල්ලකට අනුව ආරක්ෂක කැමරා දර්ශන (CCTV) පරීක්ෂා කරමින් සිදුකළ විමර්ශනයේදී සැකකරු හඳුනා ගැනීමට හැකි වී තිබේ. ඔහුගෙන් කළ ප්රශ්න කිරීම්වලදී ඇඹිලිපිටිය ප්රදේශයේ ව්යාපාරිකයෙකු ළඟ තිබූ මැණික් ගල් තොගය සහ සැකකරු සන්තකයේ තිබූ රන් භාණ්ඩ හා රුපියල් 52,000ක මුදලක් ද සොයා ගැනීමට පොලීසිය සමත් විය.
රත්නපුර නියෝජ්ය පොලිස්පතිනි රේණුකා ජයසුන්දර මහත්මියගේ සහ ජ්යෙෂ්ඨ පොලිස් අධිකාරීවරයාගේ උපදෙස් මත, මූලස්ථාන පොලිස් පරීක්ෂක ප්රසන්න සුමනසිරි සහ අපරාධ විමර්ශන අංශයේ ස්ථානාධිපති බමුණුසිංහ යන මහත්වරුන් ඇතුළු නිලධාරීන් කණ්ඩායමක් මෙම සාර්ථක මෙහෙයුම ක්රියාත්මක කළහ. අත්අඩංගුවට ගත් සැකකරු රත්නපුර මහේස්ත්රාත් අධිකරණයට ඉදිරිපත් කිරීමට නියමිතය.
