සබරගමුව පළාතේ ප්රධානතම සෞඛ්ය සේවා මධ්යස්ථානය වන රත්නපුර ශික්ෂණ රෝහලේ නව ළමා වාට්ටු සංකීර්ණයේ සිව්වන මහලේ ‘ළමා දැඩි සත්කාර ඒකකය’ (PICU) ඉදි කිරීමේ ව්යාපෘතිය සඳහා අමාත්ය මණ්ඩල අනුමැතිය හිමිව තිබේ. සෞඛ්ය හා ජනමාධ්ය අමාත්යවරයා ඉදිරිපත් කළ යෝජනාවකට අනුව, අදාළ පරිත්යාගශීලීන් සමඟ අවබෝධතා ගිවිසුමකට එළඹීම පිණිස මෙම අනුමැතිය ලබා දී ඇත.
ජාතික ක්රමසම්පාදන දෙපාර්තමේන්තුවේ ද නිර්දේශය ලැබී ඇති මෙම ව්යාපෘතියේ මුළු ඇස්තමේන්තුගත පිරිවැය රුපියල් මිලියන 64.15කි. මෙම සම්පූර්ණ මූල්ය දායකත්වය දේශීය පරිත්යාගශීලීන්ගෙන් ලබා ගැනීමට සැලසුම් කර තිබේ.
මීට පෙර 2016 වසරේදී ලබා දුන් කැබිනට් අනුමැතියකට අනුව, මෙම රෝහලේ ළමා වාට්ටු සංකීර්ණය වෙනුවෙන් පස් මහල් ගොඩනැඟිල්ලක් ඉදිකිරීම සඳහා දේශීය පරිත්යාගශීලීන් සමඟ ගිවිසුම් අත්සන් කෙරුණු අතර, මේ වන විට එහි තෙවන මහල දක්වා ඉදිකිරීම් අවසන් කර ඇත. දැන්, එහි සිව්වන මහලේ මෙම ළමා දැඩි සත්කාර ඒකකය ස්ථාපිත කිරීම සඳහා දේශීය පරිත්යාගශීලීන් නැවතත් මූල්ය සහයෝගය ලබා දීමට ඉදිරිපත් වී සිටියි.
රත්නපුර ශික්ෂණ රෝහල මේ වන විට සබරගමුව විශ්වවිද්යාලයේ වෛද්ය පීඨයට ද අනුබද්ධිතව පවතින බැවින්, මෙම නව ඒකකය ස්ථාපිත කිරීම තුළින් පළාතේ දරුවන්ට ඉහළ සායනික සත්කාරයක් ලැබෙනවා මෙන්ම වෛද්ය අධ්යාපන හා පර්යේෂණ කටයුතුවල දියුණුවට ද විශාල පිටුවහලක් ලැබෙනු ඇත.
