1876 වසරේ මැයි මස පළමුවැනිදා ආරම්භ වූ ගාල්ල රිච්මන්ඩ් විද්යාලය සිය 150 වැනි සංවත්සරය අභිමානවත් ලෙස සමරනු ලබයි. මෙම ඓතිහාසික සන්ධිස්ථානය සනිටුහන් කරමින් විශේෂ සමරු කවරයක් සහ සමරු මුද්දරයක් නිකුත් කිරීමේ උත්සවය අග්රාමාත්ය ආචාර්ය හරිනි අමරසූරිය මහත්මියගේ ප්රධානත්වයෙන් ඊයේ (01) අග්රාමාත්ය කාර්යාලයේදී පැවැත්විණි. තැපැල් දෙපාර්තමේන්තුවේ මුද්දර කාර්යාංශය මගින් සංවිධානය කළ මෙම අවස්ථාවට විද්යාලයේ විදුහල්පතිවරයා ඇතුළු ආදි සිසුන් සහ සම්භාවනීය අමුත්තන් රැසක් එක්ව සිටියහ.
උත්සවයේදී අදහස් දැක්වූ රිච්මන්ඩ් විද්යාලයේ විදුහල්පති ප්රභාත් විතානගේ මහතා, විද්යාලයේ 150 වැනි වසර සැමරීම වෙනුවෙන් මෙම අභිමානවත් අවස්ථාව සංවිධානය කිරීමට හැකිවීම පිළිබඳව සිය කෘතඥතාව පළ කළේය. අග්රාමාත්ය ආචාර්ය හරිනි අමරසූරිය මහත්මිය සිය අදහස් දක්වමින් සඳහන් කළේ, ඕනෑම අධ්යාපන ආයතනයක් වසර 150ක් වැනි දීර්ඝ කාලයක් විශිෂ්ට මෙහෙවරක නිරත වීම අතිශය වැදගත් සන්ධිස්ථානයක් බවයි. රිච්මන්ඩ් විද්යාලය අතීතයේ සිටම රටට අවශ්ය විවිධ ක්ෂේත්ර නියෝජනය කරන පුරවැසියන් බිහිකළ ආකාරයටම, ඉදිරියටත් එම මෙහෙවර අඛණ්ඩව ඉටු කරනු ඇති බවට තමන් විශ්වාස කරන බව ද අග්රාමාත්යවරිය වැඩිදුරටත් අවධාරණය කළාය. එමෙන්ම සමරු මුද්දරයේ නිර්මාණාත්මක ස්වරූපය තුළින් විද්යාලයේ පවතින නවෝත්පාදන සහ නිර්මාණශීලී පසුබිම මැනවින් පිළිබිඹු වන බවද ඇය පැවසුවාය.
