දකුණු ආසියාවේ වැඩිහිටි සත්කාර සේවා ක්ෂේත්රයේ ප්රමුඛ ආයතනයක් වන රෝයල් නර්සින් හෝම් (පෞද්ගලික) සමාගමේ නව ප්රධාන කාර්යාලය අංක 82, බාන්ස් පෙදෙස, කොළඹ 07 යන ලිපිනයේදී විවෘත කෙරිණි.
ඉන්දියාවේ පෝර්ටියා වෛද්ය ආයතනය අභිබවා යමින් ස්ථිර සෞඛ්ය සේවකයන් 1,600කට අධික සංඛ්යාවක් සේවයේ නිරත මෙම ආයතනය, ගල්කිස්ස, මහරගම, පන්නිපිටිය, කඩුවෙල, මාලඹේ, හංවැල්ල, අතුරුගිරිය සහ එක්සත් රාජධානියේ ලන්ඩන් නගරය ආශ්රිතව හෙද නිවාස අටකින් සමන්විත පුළුල් සේවා ජාලයක් පවත්වාගෙන යයි. ශ්රී ලංකාවේ පෞද්ගලික අංශයට අයත් විශාලම ගිලන් රථ සේවා ජාලයටද හිමිකම් කියන රෝයල් නර්සින් හෝම් සමාගම, මෙම සුවිශේෂ වර්ධනයත් සමඟ දකුණු ආසියාවේ විශාලම වැඩිහිටි සත්කාර සේවා ආයතනය බවට පත්ව තිබේ.
හෙද සේවකයන් 25 දෙනෙකුගෙන් යුත් කණ්ඩායමක් සමඟ 2007 වසරේදී සභාපති මනුජ හේවාවසම් මහතාගේ නායකත්වයෙන් ආරම්භ කරන ලද මෙම ආයතනය, දශක දෙකකට ආසන්න කාලයක් පුරා ශ්රී ලංකාවේ වැඩිහිටි හා රෝගී සත්කාර සේවා ක්ෂේත්රයට සුවිශේෂී දායකත්වයක් සපයා ඇත. ISO 9001:2015 ජාත්යන්තර තත්ත්ව කළමනාකරණ සහතිකයෙන් පිදුම් ලැබූ ශ්රී ලංකාවේ ප්රථම සහ එකම වැඩිහිටි සත්කාර සේවා ආයතනය වන එය, සෞඛ්ය අමාත්යාංශය යටතේ ක්රියාත්මක පෞද්ගලික සෞඛ්ය සේවා නියාමන සභාවේ අනුමැතිය ලත් ආයතනයකි. කොළඹ 07 පිහිටි නව ප්රධාන කාර්යාලය විවෘත කිරීම ආයතනයේ වසර 19ක අඛණ්ඩ සේවා ගමන් මඟේ සුවිශේෂී සන්ධිස්ථානයක් සනිටුහන් කරයි.
