ශ්රී ලංකාවේ රබර් වගා ක්ෂේත්රය වඩාත් කාර්යක්ෂම සහ ගුණාත්මක තලයකට ඔසවා තැබීමේ අරමුණින්, වැවිලි සහ ප්රජා යටිතල පහසුකම් අමාත්යාංශයේ සෘජු මඟපෙන්වීම යටතේ රබර් සංවර්ධන දෙපාර්තමේන්තුවට වසර 7කට පසුව නව රබර් සංවර්ධන නිලධාරීන් 41 දෙනෙකු බඳවා ගැනීමට කටයුතු කර තිබේ. මෙම නවක නිලධාරීන් සඳහා නිල පත්වීම් ලිපි ප්රදානය කිරීම අද (18) වැවිලි සහ ප්රජා යටිතල පහසුකම් අමාත්ය සමන්ත විද්යාරත්න මහතාගේ ප්රධානත්වයෙන් අමාත්යාංශ ශ්රවණාගාරයේදී උත්කර්ෂවත් අන්දමින් පැවැත්වීමට සියලු කටයුතු සූදානම් කර ඇත. වසර හතක් තිස්සේ පැවති නිලධාරී පුරප්පාඩු පියවමින් ක්ෂේත්රයට එක්වන මෙම නව නිලධාරීන් පිරිස මෙරට රබර් වගාකරුවන්ගේ ගැටලු විසඳීමට සහ දේශීය රබර් නිෂ්පාදනය ඉහළ නැංවීමට මින් ඉදිරියට දිවයින පුරා සක්රීයව සේවයේ යෙදවීමට නියමිතය.
