ගෙවුණු අප්රේල් මාසයේදී මෙරට සමස්ත සංචාරක ඉපැයීම්වල කැපී පෙනෙන පහළ යාමක් සිදුව ඇති බව ශ්රී ලංකා මහ බැංකුව (CBSL) පවසයි. මහ බැංකු දත්තවලට අනුව 2026 අප්රේල් මාසයේදී ශ්රී ලංකාව උපයා ඇති සමස්ත සංචාරක ආදායම ඇමෙරිකානු ඩොලර් මිලියන 157.1ක් වන අතර, එය 2025 අප්රේල් මාසයේ වාර්තා වූ ඩොලර් මිලියන 256.7ක ආදායම සමඟ සැසඳීමේදී 38.8%ක දරුණු පසුබෑමකි. ශ්රී ලංකා සංචාරක සංවර්ධන අධිකාරියේ (SLTDA) සංඛ්යාලේඛන පෙන්වා දෙන්නේ මෙවර අප්රේල් මාසයේදී දිවයිනට පැමිණ ඇත්තේ විදෙස් සංචාරකයන් 135,643ක් පමණක් බවයි. මේ අතර, 2026 වසරේ ජනවාරි සිට අප්රේල් දක්වා මුල් මාස හතරක කාලය තුළ මෙරටට පැමිණි සමස්ත සංචාරකයන් සංඛ්යාව 876,277ක් වන අතර ඉන් උපයා ඇති සමස්ත ආදායම ඩොලර් මිලියන 1,111කි. එය 2025 වසරේ එම කාලසීමාවේ වාර්තා වූ සංචාරකයන් 896,884 සහ ඩොලර් මිලියන 1,379ක ඉපැයීම් සමඟ සැසඳීමේදී සංචාරක පැමිණීම් 2.3%කින් සහ සමස්ත සංචාරක ආදායම 19.4%ක ප්රතිශතයකින් පහළ ගොස් ඇති බව මහ බැංකු වාර්තා වැඩිදුරටත් තහවුරු කරයි.
