ග්ලාස්ගෝ 2026 පොදුකොන්මන්ලිස් (Commonwealth) ක්රීඩා උළෙලේදී හෙල්ල විසිකිරීමේ ඉසව්වෙන් රන් පදක්කම දිනාගත් රුමේෂ් තරංග සහ රිදී පදක්කම දිනාගත් පාලිත බණ්ඩාර යන ක්රීඩකයින් පිළිගැනීම සඳහා අද (05) කොළඹදී අභිමානවත් රථ පෙළපාලියක් සහ ජනතා උත්සවයක් පවත්වන ලදී.
ටොරිංටන් චතුරස්රයෙන් ආරම්භ වූ මෙම රථ පෙළපාලිය නගරය හරහා ගමන් කළ අතර, මාර්ගය පුරා රැස්ව සිටි විශාල ජනකායක් සහ පාසල් සිසුන් විසින් ජයග්රාහී ක්රීඩකයින්ට උණුසුම් පිළිගැනීමක් ලබා දුන්හ. මංපතේ පිහිටි විවිධ ආයතන සහ සංවිධාන ද මෙම ක්රීඩකයන්ගේ විශිෂ්ට ජයග්රහණය වෙනුවෙන් විශේෂ පිළිගැනීම් සංවිධානය කර තිබිණි. නගර ශාලා පරිශ්රයේදී කොළඹ නගරධාරිනී ව්රේ කැලි බැල්තාසාර් මහත්මිය සහ කොළඹ මහා නගර සභාවේ නියෝජිතයින් විසින් ද මෙම පෙරහැර උණුසුම් ලෙස පිළිගනු ලැබීය.
පසුව ටොරිංටන් චතුරස්රයේදී තරුණ කටයුතු හා ක්රීඩා අමාත්ය සුනිල් කුමාර ගමගේ, ක්රීඩා නියෝජ්ය අමාත්ය සුගත් තිලකරත්න, ක්රීඩා අමාත්යාංශයේ ලේකම් අරුණ බණ්ඩාර, ක්රීඩා සංවර්ධන දෙපාර්තමේන්තුවේ අධ්යක්ෂ ජෙනරාල් එස්. අචුතන් යන මහත්වරුන්ගේ සහභාගීත්වයෙන් විශේෂ ඇගයීම් උළෙලක් පවත්වන ලදී.
මෙහිදී අදහස් දැක්වූ අමාත්ය සුනිල් කුමාර ගමගේ මහතා සඳහන් කළේ, ක්රීඩකයන්ට සහ පුහුණුකරුවන්ට ජාත්යන්තර මට්ටමේ ඉහළම සාර්ථකත්වයන් අත්කර ගැනීම සඳහා අවශ්ය සහයෝගය රජය අඛණ්ඩව ලබා දෙන බවයි. රුමේෂ් තරංග වැනි ක්රීඩකයන්ගේ දක්ෂතා හඳුනාගෙන ඇති රජය, මූල්ය ආධාර සහ පහසුකම් ලබාදෙමින් “මිෂන් ඔලිම්පික්” (Mission Olympic) වැඩසටහන හරහා එම සහයෝගය තවදුරටත් ශක්තිමත් කරන බව ඔහු පැවසීය. 2028 ඔලිම්පික් ක්රීඩා උළෙලේදී සාර්ථකත්වයක් අත්කර ගැනීමේ අරමුණින් ක්රීඩා අංශය සංවර්ධනය කිරීමට රජය කැපවී සිටින බවද අමාත්යවරයා මෙහිදී වැඩිදුරටත් අවධාරණය කළේය.
