ඉදිරි වසර දෙක තුළ ඩෙංගු රෝගය සම්පූර්ණයෙන්ම තුරන් කිරීම අරමුණු කරගනිමින් සැලසුම්සහගත හා ඉලක්කගත ජාතික වැඩපිළිවෙළක් ක්රියාත්මක කරන බව සෞඛ්ය හා ජනමාධ්ය අමාත්ය වෛද්ය නලින්ද ජයතිස්ස මහතා පවසයි. ඩෙංගු අධි අවදානම් සෞඛ්ය වෛද්ය නිලධාරි කොට්ඨාසවල වත්මන් තත්ත්වය සමාලෝචනය කිරීම සහ මදුරු මර්දන වැඩසටහන් ශක්තිමත් කිරීම සඳහා කොළඹ ජාතික රෝහලේදී පැවති විශේෂ සාකච්ඡාවකදී අමාත්යවරයා මේ බව සඳහන් කළේය.
මෙම සාකච්ඡාවේදී පසුගිය ඩෙංගු අධි අවදානම් සමයේ ක්රියාත්මක වූ වැඩසටහන්වල අඩුපාඩු හඳුනාගැනීම, අධි අවදානම් කලාප වෙත විශේෂ අවධානය යොමු කිරීම, ඒකාබද්ධ මදුරු මර්දන මෙහෙයුම් දියත් කිරීම සහ ඩෙංගු මරණ අවම කිරීම පිළිබඳව දීර්ඝ වශයෙන් සාකච්ඡා කෙරිණි. රෝගීන් අඩුවෙන් වාර්තා වන කාලසීමාව තුළද මදුරු මර්දන වැඩසටහන් තවදුරටත් ශක්තිමත් කළ යුතු බව පෙන්වා දුන් අමාත්යවරයා, සෞඛ්ය අමාත්යාංශයේ අධීක්ෂණය යටතේ ග්රාම නිලධාරි වසම් මට්ටම දක්වා ක්රියාත්මක වන ක්රමවත් වැඩපිළිවෙළක අවශ්යතාව අවධාරණය කළේය.
ජාතික ඩෙංගු මර්දන ඒකකයේ අධ්යක්ෂ විශේෂඥ වෛද්ය කපිල කන්නන්ගර මහතා මෙහිදී ප්රකාශ කළේ, මීට පෙර දිනකට වාර්තා වූ ඩෙංගු රෝගීන් 1,300ක පමණ සංඛ්යාව 350ත් 400ත් අතර මට්ටමකට අඩු කර ගැනීමට පසුගිය කාලයේ ක්රියාත්මක කළ වැඩසටහන් හරහා හැකි වූ බවයි. කෙසේ වෙතත්, ඊයේ (04) වන විට දිවයින පුරා සමස්ත ඩෙංගු රෝගීන් සංඛ්යාව 87,536ක් සහ ඩෙංගු මරණ 63ක් වාර්තා වී ඇති බව පෙන්වා දුන් ඒ මහතා, ඉදිරි වැසි සමය සහ දේශගුණික විපර්යාස හේතුවෙන් මදුරු මර්දන වැඩසටහන් අඛණ්ඩව පවත්වාගෙන යාම අත්යවශ්ය වන බව වැඩිදුරටත් සඳහන් කළේය.
