හෝමුස් සමුද්ර සන්ධියේ ඉරානය පනවා ඇති අවහිරතා අවසන් කරන ලෙස ඉල්ලා ඇමරිකා එක්සත් ජනපදය සහ බහරේනය එක්ව එක්සත් ජාතීන්ගේ ආරක්ෂක මණ්ඩලයට ඉදිරිපත් කළ යෝජනා කෙටුම්පත වහාම ඉල්ලා අස්කර ගන්නා ලෙස රුසියාව ඉල්ලීමක් කරයි. රුසියානු නියෝජ්ය විදේශ අමාත්ය ඇලෙක්සැන්ඩර් අලිමොව් මහතා ප්රකාශ කර ඇත්තේ අදාළ යෝජනාව සඳහා රුසියාවේ සහාය ලබා දිය නොහැකි බවත්, මෙවැනි තීරණ සඳහා ඉක්මන් නොවිය යුතු බවත්ය. ගල්ෆ් කලාපීය රටවල සහාය මෙම යෝජනාවට හිමිව තිබුණද, රුසියාවේ ස්ථාවරය වී ඇත්තේ එම ලේඛනය හරහා වර්තමාන ගැටලුවට විසඳුම් සෙවිය නොහැකි බවයි.
ඇමරිකානු පාර්ශවයේ යෝජනාව වෙනුවට රුසියාව සහ චීනය එක්ව හෝමුස් සමුද්ර සන්ධිය සම්බන්ධයෙන් විකල්ප යෝජනාවක් ඉදිරිපත් කර ඇති අතර, එමගින් පාර්ශවකරුවන්ගෙන් ඉල්ලා සිටින්නේ යුද්ධය නවත්වා බලය භාවිතා කිරීමෙන් වැළකී සාකච්ඡා මේසය හරහා ගැටලු විසඳා ගන්නා ලෙසයි. කුවේටය, කටාර් රාජ්යය, සෞදි අරාබිය සහ එක්සත් අරාබි එමීර් රාජ්යය වැනි රටවල් ඇමරිකානු යෝජනාවට සහාය පළ කළද, එක්සත් ජාතීන්ගේ ආරක්ෂක මණ්ඩලයේ නිෂේධ බලය හිමි රුසියාව මෙලෙස විරෝධය දැක්වීම නිසා මෙම රාජ්යතාන්ත්රික අර්බුදය තවදුරටත් උත්සන්න වී තිබේ.
