ශ්රී ලංකා ඉතිහාසයේ ප්රථම වතාවට මෙරට ඒක පුද්ගල ආදායම ඇමරිකානු ඩොලර් 5000 සීමාව ඉක්මවා ගොස් ඇති බව සංචාරක නියෝජ්ය අමාත්ය මහාචාර්ය රුවන් රණසිංහ මහතා අද පාර්ලිමේන්තුවේදී ප්රකාශ කළේය. දශක ගණනාවක් පුරා රට පාලනය කරමින් විනාශයට පත් කළ ආර්ථිකයක් භාරගත් වත්මන් රජය, වසර එකහමාරක් වැනි කෙටි කාලයක් තුළ මෙරට ආර්ථිකය ඉතා ස්ථාවර මට්ටමකට ගෙන ඒමට සමත්ව ඇති බව ඔහු මෙහිදී අවධාරණය කර සිටියේය. රජය බලයට පත්ව වසරක් ගතවන විට ශ්රී ලංකාවේ දළ ජාතික නිෂ්පාදනය ඇමරිකානු ඩොලර් බිලියන 109ක ආසන්න අගයක් දක්වා වර්ධනය වී ඇති බවත් මෙය රටේ ආර්ථික ගමන් මගෙහි සුවිශේෂී සන්ධිස්ථානයක් බවත් අමාත්යවරයා පෙන්වා දුන්නේය.
විපක්ෂය විසින් එල්ල කරනු ලබන විවේචන වලට පිළිතුරු දෙමින් නියෝජ්ය අමාත්යවරයා සඳහන් කළේ අතීතයේදී අමාත්යාංශ සහ රටේ ආර්ථිකය විනාශ කළ පාර්ශවයන් අද වන විට දේශපාලනික වශයෙන් අනාථ වී ඇති බවයි. එවැනි පසුබිමක සිටින පිරිස් රජයේ ක්රියාකලාපය විවේචනය කළද, වත්මන් පාලනය යටතේ ජනතාවගේ ආර්ථික මට්ටම ඉහළ නැංවීමට අවශ්ය ස්ථාවර පදනම මේ වන විට සකස් කර අවසන් බව ඔහු වැඩිදුරටත් පැවසීය. මෙම ආර්ථික ජයග්රහණයන් තුළින් පෙනී යන්නේ රට නිවැරදි දිශානතියකට ගමන් කරමින් පවතින බව යැයිද හෙතෙම සභාව හමුවේ කියා සිටියේය.
