දිවයින පුරා ඩෙංගු රෝගීන් වාර්තා වීම මේ ආකාරයෙන්ම අඛණ්ඩව ඉහළ ගියහොත්, රෝහල් පද්ධතිය තුළ රෝගීන් කළමනාකරණය කර ගැනීමට නොහැකි තත්ත්වයක් උද්ගත වනු ඇති බවට නියෝජ්ය අමාත්ය රුවන් සෙනරත් මහතා අනතුරු අඟවනවා. පසුගිය වසරේ දත්ත හා සැසඳීමේදී මේ වසරේ රෝගීන් වාර්තා වීම ඉතා ඉහළ මට්ටමක පවතින බවයි අමාත්යවරයා පෙන්වා දෙන්නේ. සංඛ්යාලේඛනවලට අනුව, පසුගිය වසරේ ජූනි මාසයේදී වාර්තා වූ රෝගීන් සංඛ්යාව 5,466ක් වන අතර, මේ වසරේ ජූනි මස 21 වැනි දින වන විට පමණක් රෝගීන් 13,338 දෙනෙකු වාර්තා වී තිබේ. මේ ආකාරයට රෝගීන් වාර්තා වීම දිගින් දිගටම ඉහළ ගියහොත්, රෝහල්වල පවතින පහසුකම් යටතේ රෝගීන්ට ප්රතිකාර කිරීම සහ තත්ත්වය පාලනය කිරීම බරපතළ අභියෝගයක් වනු ඇති බව නියෝජ්ය අමාත්යවරයා වැඩිදුරටත් අවධාරණය කළේය.
මේ අතර ශීග්ර ලෙස ව්යාප්ත වන ඩෙංගු උවදුර මර්දනය සඳහා ගත යුතු කෙටි කාලීන සහ දිගුකාලීන සැලසුම් පිළිබඳ සාකච්ඡාවක් සෞඛ්ය සහ ජනමාධ්ය අමාත්ය වෛද්ය න්යාලින්ද ජයතිස්ස සහ ජනාධිපති ලේකම් ආචාර්ය නන්දික සනත් කුමානායක යන මහත්වරුන්ගේ ප්රධානත්වයෙන් ජනාධිපති කාර්යාලයේදී පැවැත්විණි. එහිදී කෙටි කාලීන ඩෙංගු මර්දනය සඳහා රාජ්ය ආයතන, පාසල් සහ පළාත් පාලන ආයතන ආවරණය වන පරිදි ගත යුතු ක්රියාමාර්ග පිළිබඳ චක්රලේඛ වහාම නිකුත් කිරීමට තීරණය විය. එමෙන්ම, ජූනි 24, 25 සහ 26 යන තෙදින තුළ ග්රාම නිලධාරී වසම් 600ක් ආවරණය වන පරිදි ඩෙංගු මර්දන වැඩසටහන් ක්රියාත්මක කිරීමටත් මෙහිදී පියවර ගැනේ.
මීට අමතරව, ත්රිවිධ හමුදාවේ මූලිකත්වයෙන් විශේෂ අධීක්ෂණ ඒකකයක් පිහිටුවීමට සහ මදුරුවන් බෝවන ලෙස පරිශ්ර පවත්වාගෙන යන්නන්ට එරෙහිව නීතිමය ක්රියාමාර්ග දැඩි කිරීමට ද මෙහිදී තීරණය විය. ප්රාදේශීය මට්ටමින් පිහිටුවා ඇති ප්රජා ශක්ති සහ මහජන ආරක්ෂක කමිටු මඟින් ඩෙංගු මර්දන කටයුතු තව දුරටත් ශක්තිමත් කිරීමට කටයුතු යොදා ඇත. මේ වන විට පාසල්, කර්මාන්තශාලා, රාජ්ය ආයතන සහ ආගමික ස්ථාන බහුල වශයෙන් ඩෙංගු මදුරුවන් බෝ වන ස්ථාන ලෙස හඳුනා ගෙන ඇති බැවින්, එම ස්ථාන ආවරණය වන පරිදි කෙටි කාලීන ක්රියාමාර්ග කඩිනම් කිරීමේ අවශ්යතාව මෙම සාකච්ඡාවේදී අවධාරණය කෙරුණු අතර, වරින් වර ඇතිවන මෙවැනි ප්රවණතා මඟහරවා ගැනීමට ගත යුතු දිගුකාලීන ක්රමවේදයන් ද විධිමත් කිරීමට මෙහිදී පියවර ගන්නා ලදී.
