රටේ ප්රජාතන්ත්රවාදයට මරු පහරක් එල්ල කරමින් වත්මන් ආණ්ඩුව ඒකාධිපති පාලනයක් කරා ගමන් කරමින් සිටින බවත්, ගොවීන්ට ලබා දුන් පොරොන්දු කඩ කරමින් ඔවුන් අන්ත අසරණ තත්ත්වයට පත් කර ඇති බවත් විපක්ෂ නායක සජිත් ප්රේමදාස මහතා පවසයි.
තිස්සමහාරාමයේදී පැවති ගොවි ගැටලු විසඳීමේ ජන හමුවක් අමතමින් විපක්ෂ නායකවරයා මේ බව සඳහන් කළේය. එහිදී වැඩිදුරටත් අදහස් දැක්වූ ඔහු සඳහන් කළේ, විනිසුරුවන්ගේ විශ්රාම වයස ඉහළ නැංවීම වැනි ක්රියාමාර්ග හරහා ආණ්ඩුව තනි පක්ෂ පාලනයක් හා ආඥාදායකත්වයක් රට තුළ ක්රියාත්මක කිරීමට උත්සාහ කරන බවයි.
එමෙන්ම, වී කිලෝවකට රුපියල් 150ක ස්ථාවර මිලක් ලබා දෙන බවට පොරොන්දු වී බලයට පත් වුවද, අද වන විට නිෂ්පාදන පිරිවැයටත් වඩා අඩු මිලකට ගොවියාගේ අස්වැන්න මිලදී ගනිමින් ගොවි ජනතාව දැඩි අර්බුදයකට ලක් කර ඇති බව ඔහු පෙන්වා දුන්නේය. ගොවි උපකරණ මත පවා වැට් (VAT) බදු පනවමින් රාජ්ය ආදායම ඉහළ නංවා ගත්තද, එම ප්රතිලාභය ගොවියාගේ නිෂ්පාදන පිරිවැය අඩු කිරීමට යොදවා නොමැති බවද විපක්ෂ නායකවරයා මෙහිදී අවධාරණය කළේය. රටේ උත්තරීතර බලය ඇත්තේ ජනතාව සතුව බැවින්, ප්රජාතන්ත්රවාදය විනාශ කරන මෙම මංකොල්ලකාරී ප්රතිපත්තියට එරෙහිව ගොවි ජනතාව සහ සමස්ත පුරවැසියන් තවදුරටත් නිහඬව නොසිට පෙරට ආ යුතු බව ඔහු වැඩිදුරටත් කියා සිටියේය.
