එල්නීනෝ සහ ලානීනා දේශගුණික තත්ත්වයන් මඟින් රටේ මූල්ය, මුදල් හා කෘෂිකාර්මික ප්රතිපත්තිවලට දැවැන්ත බලපෑම් එල්ල විය හැකි බැවින්, ඒ සම්බන්ධයෙන් වගකිවයුතු ආයතන ඉදිරි සැලසුම් සහිතව කටයුතු කළ යුතු බව විපක්ෂ නායක සජිත් ප්රේමදාස මහතා පැවසීය. දේශගුණික විපර්යාස පිළිබඳ පාර්ලිමේන්තු සංසදය අමතමින් ඔහු සඳහන් කළේ, ශ්රී ලංකා මහ බැංකුව, මහා භාණ්ඩාගාරය සහ කෘෂිකර්ම අමාත්යාංශය මේ පිළිබඳව විශේෂ අවධානය යොමු කළ යුතු බවයි.
මධ්යම ආණ්ඩුව සහ පළාත් පාලන ආයතන ඒකාබද්ධ කරමින් ජාතික කෘෂිකර්ම ප්රතිපත්තියක් සහ ජාතික ජල කළමනාකරණ සැලසුමක් සකස් කිරීමේ කාලීන අවශ්යතාව පෙන්වා දුන් ඒ මහතා, මහවැලි කලාප ඇතුළු සියලු ජලාශ්ර සම්බන්ධ කරමින් කාර්යක්ෂම ජල කළමනාකරණයක් ක්රියාත්මක කළ යුතු බව ද ප්රකාශ කළේය. එල්නීනෝ තත්ත්වය හේතුවෙන් ලෝක වෙළඳපොළේ ආහාර, ඉන්ධන සහ ගෑස් මිල ඉහළ යාම හරහා මෙරට විදේශ සංචිතවලට සහ ආර්ථිකයට වක්ර බලපෑම් එල්ල විය හැකි බැවින්, ඒ පිළිබඳව කල්තියා අවදානම් තක්සේරු කිරීමක් සිදු කළ යුතු බව ද ඔහු අවධාරණය කළේය.
එසේම ආපදා තත්ත්වයන්හිදී ජාත්යන්තර මූල්ය ආධාර ලබා ගැනීමේදී ක්රියාත්මක වන ‘Re-purpose Fund’ ක්රමවේදය පිළිබඳව සැලකිලිමත් විය යුතු බව සජිත් ප්රේමදාස මහතා සඳහන් කළේය. පවතින සංවර්ධන ව්යාපෘතිවල මුදල් හදිසි අවශ්යතා සඳහා යොදවා ගැනීමෙන් එම ව්යාපෘති අඩපණ වන බැවින්, එම මුදල් නැවත පියවීම පිළිබඳව ජාත්යන්තර මූල්ය ආයතන සමඟ පැහැදිලි එකඟතාවකට පැමිණිය යුතු බවත්, ආපදාවලදී ලබාගත යුත්තේ ණය නොව ආධාර බවත් ඔහු පැවසීය. තවද, පරිසර අමාත්යාංශය සමඟ එක්ව වනජීවී හා වනාන්තර පද්ධතිවලට සිදුවන හානිය ඇතුළු පාරිසරික හානිවල ආර්ථික වටිනාකම ද නිසි ලෙස තක්සේරු කිරීම රටේ සමස්ත ආර්ථික තක්සේරුව සඳහා වැදගත් වන බව විපක්ෂ නායකවරයා වැඩිදුරටත් ප්රකාශ කළේය.
