ඉදිරියේදී පැවැත්වෙන ජනාධිපතිවරණයේ අපේක්ෂකත්වය සම්බන්ධයෙන් පසුගිය සමයේ සිටි රාජකීය පවුල තුළ අද බලු පොරයක් හටගෙන ඇති බව නිවාස හා ඉදිකිරීම් අමාත්ය සජිත් ප්රේමදාස මහතා පවසයි.
අමාත්යවරයා මේ බව පැවසුවේ මඩකලපුව දිස්ත්රික්කයේ, එරාවුර්පත්තු, සවුක්කඩි හි ඉදිකළ “විරුට්චම්” උදා ගම්මානය ජනතා අයිතියට පත්කිරීමේ අවස්ථාවට අද (13) දින සහභාගී වෙමින්.
“සැමට සෙවණ” යළි පිබිදෙන උදා ගම්මාන වැඩසටහන යටතේ ජනතා අයිතියට පත් කළ 106 වන ආදර්ශ ගම්මානය මෙයයි.
යහපාලන රජය තුළ අද පොරයක් පැවතුණත් එය තනතුරු උදෙසා නොව ජනතාවට නොමිලේ ඉඩම් ලබාදීමට, නිවාස ඉදිකර උදාගම්මාන ඉදිකිරීමට හා ජනතාවට සහන, සංවර්ධනය ලබා දීමට බවද අමාත්යවරයා සඳහන් කළේය.
රාජකීය පවුල තුළ බලු පොරයක් හටගෙන තිබෙන්නේ මෙරට ලක්ෂ 210 ක් වූ ජනතාව ගැන සිතා නොව කෙසේ හෝ රාජ්ය බලය ලබාගෙන ඩොලර්වලින් පවුම් වලින් ජනතා මුදල් ගසා කෑමට ඇති කෑදරකම නිසා බවත් අමාත්යවරයා මෙහිදි වැඩිදුරටත් පැවසීය.
විරුද්ධ කණ්ඩායම් බලය ලබා ගැනීමේ අරමුණින් අද පන්සල්, පල්ලි, කෝවිල්, දේවස්ථාන ගානේ ගොස් අලුත්ම වන්දනා ක්රමයක් ආරම්භ කර ඇති බවද අමාත්යවරයා සඳහන් කළේය.
නිවාස 29 කින් සමන්විත මෙම ගම්මානය අංග සම්පූර්ණව ඉදිකිරීම සඳහා වැයකළ මුදල රුපියල් ලක්ෂ 247 කි. පිරිසිදු පානීය ජලය, විදුලිය, ප්රවේශ මාර්ග හා විධිමත් අභ්යන්තර මාර්ග ඇතුළු සියලු යටිතල පහසුකම් වලින් මෙය සමන්විත වේ.
“විරුට්චම්” ජනතා අයිතියට පත්කිරීමට සමගාමීව නිවාසලාභීන් 29 දෙනාට නිවාස හිමිකම් පත්ර සහ රුපියල් ලක්ෂ 348 ක් වටිනා සංවර්ධිත බිම් කොටස් 29 ක හිමිකම් ප්රදානය, ප්රදේශයේ අඩු ආදායම්ලාභී පවුල් 200 කට රුපියල් ලක්ෂ 200 ක් වටිනා ‘විසිරි නිවාස ණය’, ප්රතිලාභීන් 75 කට රුපියල් ලක්ෂ 150 ක් වටිනා ‘සොඳුරු පියස නිවාස ණය’, ප්රතිලාභී පවුල් 192 කට රුපියල් ලක්ෂ 960 ක් වටිනා නිවාස අධාර ප්රදානය, සහ දෘෂ්යාබාධ සහිත පුද්ගලයින් 106 දෙනෙකුට ඇස් කණ්නාඩි ප්රදානය කිරීමද අමාත්යවරයා අතින් මෙහිදී සිදු කෙරුණි.
මෙම අවස්ථාවට ධීවර, ජලජ සම්පත් සංවර්ධන හා ග්රාමීය ආර්ථික නියෝජ්ය අමාත්ය එම්. එස්. එස්. අමීර් අලී, ජාතික ඒකාබද්ධතා, සංහිඳියා හා රාජ්ය භාෂා නියෝජ්ය අමාත්ය සෙය්යඩී අලිසහීර් මව්ලානා හා පාර්ලිමේන්තු මන්ත්රීවරුන් වන ජී. ශ්රීනේෂන් සහ එස්. යෝගේෂ්වරන් යන මහත්වරු ඇතුළු විශාල පිරිසක් සහභාගී වූහ.
