OpenAI සමාගමේ ප්රධාන විධායක නිලධාරී සෑම් ඇල්ට්මන්ගේ (Sam Altman) නිවසට ‘මොලොටොව් කොක්ටේල්’ (Molotov cocktail) ප්රහාරයක් එල්ල කිරීම සහ එම සමාගම් මූලස්ථානයට ගිනි තැබීමට උත්සාහ කිරීම සම්බන්ධයෙන් ටෙක්සාස් ප්රාන්තයේ පදිංචි 20 හැවිරිදි තරුණයෙකුට චෝදනා එල්ල වී තිබේ. සැන් ෆ්රැන්සිස්කෝහි පිහිටි ඇල්ට්මන්ගේ නිවසට ගිනි අවුලුවන උපකරණයක් විසි කරන ආකාරය ආරක්ෂිත කැමරාවල සටහන් වී ඇති බව ෆෙඩරල් විමර්ශන කාර්යාංශය (FBI) සඳහන් කරයි.
ඩැනියෙල් මොරේනෝ-ගාමා (Daniel Moreno-Gama) නමැති මෙම තරුණයාව අත්අඩංගුවට ගන්නා අවස්ථාවේදී ඔහු සතුව තිබී කෘත්රිම බුද්ධියට (AI) එරෙහිව ලියන ලද ලිපියක් ද සොයාගෙන ඇත. එම ලිපියෙහි සෑම් ඇල්ට්මන් වෙත එල්ල කරන ලද විවිධ තර්ජන ඇතුළත් වී ඇති අතර, එය මෙම ප්රහාරයට ප්රධානතම හේතුව ලෙස බලධාරීන් සැක පළ කරයි.
අමෙරිකානු නීතිඥ ක්රේග් මිසාකියන් (Craig Missakian) ප්රකාශ කළේ, මහජන ප්රතිපත්ති වෙනස් කිරීම හෝ බලධාරීන්ට බලපෑම් කිරීම සඳහා මෙම ප්රහාරය එල්ල කර ඇති බවට සාක්ෂි ලැබුණහොත්, මෙය දේශීය ත්රස්තවාදී ක්රියාවක් ලෙස සලකා ඔහුට එරෙහිව උපරිම දඬුවම් ලබාදීමට කටයුතු කරන බවයි.
