සණස ජීවිත රක්ෂණ සමාගම පීඑල්සී (SANASA Life Insurance Company PLC) හි නව ප්‍රධාන විධායක නිලධාරී (CEO) ලෙස මෙරට රක්ෂණ ක්ෂේත්‍රයේ ප්‍රවීණ වෘත්තිකයෙකු වන සුසන්ත ද සිල්වා මහතා පත් කර තිබේ. දශක තුනකට අධික දීර්ඝ කාලීන ව්‍යාපාරික හා විධායක නායකත්ව අත්දැකීම් සහිත ඒ මහතාගේ මෙම ආයතනික නායකත්ව සංක්‍රාන්තිය, මෙරට ජීවිත රක්ෂණ ක්ෂේත්‍රයේ තරඟකාරීත්වය හා පාරිභෝගික කේන්ද්‍රීය නවෝත්පාදනයන් වේගවත් කිරීම උදෙසා ගත් වැදගත් උපායමාර්ගික පියවරක් ලෙස සැළකේ. කොළඹ පිහිටි ප්‍රධාන කාර්යාලයේ පැවති නිල උත්සවයකදී ඔහු සිය ධුරයේ රාජකාරි ආරම්භ කළ අතර, එම අවස්ථාවට සමාගමේ නිර්මාතෘ ආචාර්ය පී.ඒ. කිරිවන්දෙණිය මහතා ඇතුළු ජ්‍යෙෂ්ඨ අධ්‍යක්ෂ මණ්ඩලය සහභාගී වූහ.
සෙලින්කෝ ජෙනරල් ඉන්ෂුවරන්ස් වෙතින් සිය වෘත්තීය ගමන ආරම්භ කළ සුසන්ත ද සිල්වා මහතා, පසුව යුනියන් ඇෂුවරන්ස්, ජනශක්ති, අලියාන්ස් ලයිෆ් සහ කෝප් ලයිෆ් යන මෙරට ප්‍රමුඛ පෙළේ රක්ෂණ ආයතන රැසක ඉහළ කළමනාකාරීත්ව තනතුරු හොබවමින් සුවිශේෂී ක්ෂේත්‍ර නායකත්වයක් ගොඩනගාගෙන ඇති වෘත්තිකයෙකි. මෙම නායකත්ව වෙනසට සමගාමීව, මෙතෙක් ප්‍රධාන විධායක නිලධාරී ධුරය දැරූ නුවන්ප්‍රිය ගුණවර්ධන මහතා සමාගමේ ප්‍රධාන තොරතුරු නිලධාරී (CIO) ලෙස පත් කර තිබීම විශේෂත්වයකි. ආයතනයේ තොරතුරු තාක්ෂණ පද්ධතිය නවීකරණය කිරීම සහ ඩිජිටල් වර්තන ක්‍රියාවලිය වේගවත් කිරීම සඳහා ඔහු සතු තාක්ෂණික කුසලතාව සහ පරිණතභාවය ඉදිරියටත් යොදා ගැනීම මෙම උපායමාර්ගික නැවත පෙළගැස්මේ ප්‍රධාන අරමුණයි.
ගෝලීය මූල්‍ය හා තාක්ෂණික ප්‍රවණතා හමුවේ රක්ෂණ ක්ෂේත්‍රය මුහුණ දෙන අභියෝග ජය ගැනීම සඳහා පුළුල් වෙළඳපල අත්දැකීම් සහ උසස් තාක්ෂණික නායකත්වය එකට ඒකාබද්ධ කිරීමට සණස ජීවිත රක්ෂණ සමාගම මෙලෙස පියවර ගෙන ඇත. නව නායකත්වය යටතේ ආයතනික මෙහෙයුම් කාර්යක්ෂමතාව ඉහළ නංවමින්, තිරසාර වර්ධනයක් සෙවීම සහ පාරිභෝගිකයන්ට වඩාත් ගුණාත්මක ඩිජිටල් රක්ෂණ විසඳුම් පිරිනැමීම ඉදිරි කාලසීමාව තුළ අපේක්ෂා කෙරේ. මෙරට ග්‍රාමීය හා නාගරික මූල්‍ය පරිසර පද්ධතිය තුළ සණස ජාලය සතු ශක්තිමත් පදනම තවදුරටත් පුළුල් කිරීමට මෙම හදිසි කළමනාකාරීත්ව වෙනස්කම් මහත් රුකුලක් වනු ඇත.
