කොළඹ ගාලු මුවදොර පිටියේදී පැවැති ‘සංගමම් 2026’ භරතනාට්ය උත්සවයේදී භරතනාට්ය ශිල්පීන් 4,988 දෙනෙකු සහභාගී වූ දැවැන්ත නර්තන වැඩසටහනක් හරහා නව ගිනස් ලෝක වාර්තාවක් පිහිටුවා තිබේ.
මීට පෙර පැවැති වාර්තාව වූ ශිල්පීන් 416 දෙනාගේ වාර්තාව බිඳ හෙළමින් ශ්රී ලංකාව මෙලෙස නව සංස්කෘතික සන්ධිස්ථානයක් සනිටුහන් කළේය. මෙම වැඩසටහන නියෝජ්ය අමාත්ය සුන්දරලිංගම් ප්රදීප් මහතාගේ මගපෙන්වීම යටතේ සංවිධානය කෙරිණි.
ඉන්දියාවේ සංගමම් ගෝලීය ඇකඩමිය සහ ශ්රී ලංකාවේ සංගමිෂ් ලියා හොලිඩේස් ආයතනය එක්ව මෙම උත්සවය සම්බන්ධීකරණය කර තිබූ අතර, ඒ සඳහා ශ්රී ලංකාව සහ ඉන්දියාව නියෝජනය කරමින් භරතනාට්ය ශිල්පීන් විශාල පිරිසක් සහභාගී වූහ. එක්සත් රාජධානියේ සිට පැමිණි ගිනස් ලෝක වාර්තා විනිශ්චයකාර රිෂි නාත් මහතා විසින් මෙම වාර්තාගත උත්සාහය නිල වශයෙන් අධීක්ෂණය කර තහවුරු කරන ලදී.
ඉන්දීය මහ කොමසාරිස් සන්තෝෂ් ජා මහතා ඇතුළු දේශපාලන නියෝජිතයින් සහ විශාල පිරිසක් මෙම අවස්ථාවට සහභාගී වූ අතර, මෙය ඉන්දු-ශ්රී ලංකා සංස්කෘතික බැඳීම් ශක්තිමත් කිරීමට ඉවහල් වූ බව ඔවුන් සඳහන් කළහ.
