පසුගිය කාලයේ කොතෙක් ආඩම්බරයෙන් කතා කළද, වත්මන් මාලිමා ආණ්ඩුව හෝ ඔවුන්ගේ කණ්ඩායම සතුව අර්බුද කළමනාකරණය සඳහා වන ප්රායෝගික දැනුමක් හෝ අවබෝධයක් නොමැති බව හිටපු පාර්ලිමේන්තු මන්ත්රී සංජීව එදිරිමාන්න මහතා ප්රකාශ කරයි. ශ්රී ලංකා පොදුජන පෙරමුණ පක්ෂ මූලස්ථානයේදී 27 පැවති ප්රවෘත්ති සාකච්ඡාවකට එක්වෙමින් හෙතෙම මේ බව සඳහන් කළේය.
‘පොහොසත් රටක් ලස්සන ජීවිතයක්’ යන තේමාව පෙරදැරි කරගෙන, ආර්ථිකය ගොඩනඟා ජනතාවට සහන සලසන බවට වූ ප්රමුඛ පොරොන්දුව මත මාලිමා ආණ්ඩුව බලයට පත්වුව ද, වත්මන් ආර්ථික වටපිටාව යහපත් නොවන බව ඔහු පෙන්වා දෙයි. විශේෂයෙන්ම උද්ධමනය ඉහළ යාම, රුපියල මත ඇති වී තිබෙන දැඩි පීඩනය සහ ආනයන භාණ්ඩ සඳහා අධික පිරිවැයක් දැරීමට සිදුවීම වැනි කරුණු මුල් කරගනිමින් ආණ්ඩුව මේ වන විට පොලී අනුපාතිකය සියයට එකකින් ඉහළ දැමීමට තීරණය කර ඇති බවත්, එය පවතින ආර්ථික අර්බුදයේ සංකේතයක් බවත් ඔහු පැවසීය.
මෙම තීරණය හේතුවෙන් පොදු මහජනතාවගේ මෙන්ම කුඩා හා මධ්ය පරිමාණ ව්යාපාරිකයන්ගේ ණය පිරිවැය සහ නිෂ්පාදන වියදම් ඉහළ ගොස්, ආයෝජන සහ මුදල් සංසරණය පහළ වැටීමෙන් ඔවුන් දැඩි අර්බුදයකට මුහුණ දෙන බව හිටපු මන්ත්රීවරයා අවධාරණය කළේය. ඕනෑම අර්බුදයක් පාලනය කිරීමට තමන්ටම අනන්ය වූ විසඳුම් ආකෘතියක් ඇති බව පවසමින් බලයට පැමිණි ආණ්ඩුව, පවතින ගෝලීය බලපෑම් හමුවේ එම අනන්ය විසඳුම් මහපොළොවේ ක්රියාත්මක කරන්නේ කවදාදැයි තමන් ප්රශ්න කරන බව ද සංජීව එදිරිමාන්න මහතා වැඩිදුරටත් කියා සිටියේය.
