ත්රස්තවාදය වැළැක්වීමේ පනත (PTA) යටතේ අපරාධ පරීක්ෂණ දෙපාර්තමේන්තුව (CID) භාරයේ පසුවන හිටපු බුද්ධි අංශ ප්රධානී සුරේෂ් සලේ මහතා සම්බන්ධයෙන් අදහස් දක්වමින්, ඔහු හමුදා නිලධාරියෙකු ලෙස නොව හිටපු ජනාධිපති ගෝඨාභය රාජපක්ෂ මහතාගේ වහලෙකු ලෙස කටයුතු කළ පුද්ගලයෙකු බව හිටපු හමුදාපති සරත් ෆොන්සේකා මහතා ප්රකාශ කළේය. සුරේෂ් සලේ මහතා සිදුකළ සෑම ක්රියාවක්ම ගෝඨාභය රාජපක්ෂ මහතාගේ සෘජු අනුදැනුම මත සිදුවූ බවත්, ඔහුගේ අවසරයකින් තොරව සලේ මහතා වැසිකිළියටවත් නොගිය බවත් ෆොන්සේකා මහතා සඳහන් කළේය.
මෙහිදී සුරේෂ් සලේ මහතාව පාස්කු ප්රහාරයේ “මහ මොළකරුගේ පශ්චාත් භාගය” ලෙසත්, ගෝඨාභය රාජපක්ෂ මහතාව එහි “ඔලුව” ලෙසත් උපහාසාත්මකව හැඳින්වූ ෆොන්සේකා මහතා, සෙසු රාජපක්ෂවරුන් ද මෙම සමස්ත ක්රියාවලිය පිළිබඳව මැනවින් දැනුවත්ව සිටි බව අවධාරණය කළේය. පාස්කු ඉරිදා මරාගෙන මැරෙන ප්රහාරයේ නායකයා ලෙස සැලකෙන සහරාන් හෂීම් ඇතුළු පිරිස සමඟ සුරේෂ් සලේ මහතා ඉතා සමීප සබඳතාවක් පැවැත්වූ බවට ද හෙතෙම චෝදනා කළේය. එසේම, යුද්ධයෙන් පසු කාලසීමාවේදී සහරාන් ඇතුළු අන්තවාදීන් දහස් ගණනකට වැටුප් ගෙවන ලද්දේ සලේ මහතා විසින් බවත්, එම මූල්ය ගනුදෙනු සියල්ල රාජපක්ෂවරුන්ගේ පූර්ණ ආශිර්වාදය ඇතිව සිදුවූ බවත් ඔහු පැවසීය.
මීට පෙර තමා අත්අඩංගුවට ගෙන මාස අටක් තිස්සේ කිසිදු නඩුවක් හෝ නිල චෝදනාවක් නොමැතිව රඳවා තබාගෙන හිරිහැර කිරීමට ගෝඨාභය රාජපක්ෂ මහතාට උපදෙස් ලබාදුන්නේ ද සුරේෂ් සලේ ඇතුළු පිරිස බව ෆොන්සේකා මහතා මෙහිදී සිහිපත් කළේය. එම වකවානුවේදී තමාගේ බිරිඳ සහ දියණියන් පවා දැඩි මානසික පීඩනයකට ලක්කරමින්, ගුවන් තොටුපළේදී ඔවුන්ගෙන් ද්වේෂසහගත ලෙස ප්රශ්න කිරීම් සිදුකළ බව ඔහු පෙන්වා දුන්නේය. තමාට සහ තම පවුලේ සාමාජිකයන්ට එදා සිදුකළ එම අසාධාරණයන්ට හා සාපරාධී ක්රියාවන්ට අද සලේ මහතාට මුහුණ දීමට සිදුව ඇත්තේ දිට්ඨධම්මවේදනීය කර්මය පලදීම නිසා බවත්, දැන් “සලේලාගේ වෙලාව” පැමිණ ඇති බවත් හිටපු හමුදාපතිවරයා වැඩිදුරටත් කියා සිටියේය.
