ශ්රී ලංකාවේ කාන්තා හා ළමා කටයුතු අමාත්ය සරෝජා එස්. පෝල්රාජ් මහත්මිය බ්රිතාන්යයේ සිදු කළ නිල රාජ්යතාන්ත්රික සංචාරය සාර්ථකව අවසන් කර තිබේ. ළමා ආරක්ෂාව, සමාජ සුබසාධනය සහ ජාත්යන්තර සහයෝගිතාව ශක්තිමත් කිරීම අරමුණු කරගත් මෙම සංචාරයේදී අමාත්යවරිය බ්රිතාන්ය නියෝජ්ය අගමැති රයිට් ඔනරබල් ඩේවිඩ් ලැමී මහතාගේ ප්රධානත්වයෙන් පැවැති අමාත්ය මට්ටමේ වට මේස සාකච්ඡාවකට එක්වූවාය.
එහිදී ශ්රී ලංකාවේ විකල්ප ළමා රැකවරණ පද්ධතියේ ප්රතිසංස්කරණ පිළිබඳව කරුණු පැහැදිලි කළ අමාත්යවරිය, දරුවන් ආයතනගත කිරීම වෙනුවට පවුල් පාදක කරගත් රැකවරණය සහ ප්රජා ආරක්ෂණ යන්ත්රණ ශක්තිමත් කිරීමට රජය ලබා දෙන ප්රමුඛතාව අවධාරණය කළාය. එක්සත් රාජධානි සහ දකුණු අප්රිකානු රජයන් එක්ව සංවිධානය කළ ‘Global Partnerships Conference’ සමුළුවට සහභාගී වූ ඇය, කාන්තාවන්ට හා දරුවන්ට එරෙහි ප්රචණ්ඩත්වය වැළැක්වීම ඇතුළු ගෝලීය අභියෝගයන්ට ජාත්යන්තර හවුල්කාරිත්වයන් ගොඩනැඟීමේ වැදගත්කම සාකච්ඡා කළාය.
බ්රිතාන්ය විදේශ, පොදුරාජ්ය මණ්ඩලීය සහ සංවර්ධන කාර්යාලයේ (FCDO) නිලධාරීන් සමඟ පැවැති විශේෂ සාකච්ඡාවලදී අන්තර්ජාලය හරහා සිදුවන ස්ත්රී පුරුෂ සමාජභාවය පදනම් කරගත් ප්රචණ්ඩත්වය (online gender-based violence) වැනි නැඟී එන තර්ජන පිළිබඳව දීර්ඝ වශයෙන් කරුණු හුවමාරු කරගනු ලැබීය. තවද, සුළු මවුපිය රැකවරණ (foster care) ආකෘති වැඩිදියුණු කිරීම සහ ළමා ආරක්ෂණ යන්ත්රණ උසස් කිරීම පිළිබඳවද එහිදී අවධානය යොමු විය. මෙම සංචාරය තුළින් ශ්රී ලංකාවේ ළමා හා ප්රජා සහයෝගිතා පද්ධති ශක්තිමත් කිරීමට අවශ්ය ජාත්යන්තර සහාය ලබා ගැනීම සඳහා මඟ පෑදී තිබේ.
