ශ්රී ලංකාව සහ ඉන්දියාව අතර පවත්නා ද්විපාර්ශ්වික සබඳතා තවදුරටත් ශක්තිමත් කිරීමේ අරමුණින්, කාන්තා හා ළමා කටයුතු අමාත්ය සරෝජා සවිත්රි පෝල්රාජ් මහත්මියගේ ප්රධානත්වයෙන් යුත් ශ්රී ලංකා පාර්ලිමේන්තු මන්ත්රීවරියන්ගේ සංසදයේ නියෝජිත පිරිසක් මේ දිනවල ඉන්දියාවේ නිල සංචාරයක නිරත වෙති. මැයි 10 වැනිදා ආරම්භ වූ මෙම සංචාරය අද (16) දින අවසන් වීමට නියමිත අතර, මෙය ශ්රී ලංකාවේ ඉන්දීය මහ කොමසාරිස් කාර්යාලයේ විශේෂ ආරාධනයකට අනුව සිදුවූවකි.
මෙම සංචාරය තුළදී නියෝජිත පිරිස ඉන්දීය පාර්ලිමේන්තුවේ ලෝක් සභාවේ කථානායක ඕම් බිර්ලා මහතා හමුවී අන්තර් පාර්ලිමේන්තු සහයෝගිතාව පිළිබඳව අදහස් හුවමාරු කරගත් අතර, එහි පිහිටි මහත්මා ගාන්ධි පිළිරුවට පුෂ්පෝපහාර දැක්වීමට ද කටයුතු කළහ. මීට අමතරව, ඉන්දියාවේ කාන්තා හා ළමා සංවර්ධන අමාත්ය අන්නපූර්ණා දේවී මහත්මිය සහ එම අමාත්යාංශයේ නිලධාරීන් හමුවූ නියෝජිත පිරිස, කාන්තා සවිබල ගැන්වීම, ළමා සුභසාධනය සහ ස්ත්රී-පුරුෂ සමාජභාවය පිළිබඳ සංවේදී ප්රතිපත්ති සැකසීමේදී දෙරට අතර පවතින හොඳම භාවිතයන් හුවමාරු කර ගැනීම සම්බන්ධයෙන් ඵලදායී සාකච්ඡා පවත්වා තිබේ.
