2028 වසරේ පැවැත්වීමට නියමිත ලොස් ඇන්ජලීස් (LA28) ඔලිම්පික් ක්රීඩා උළෙල සඳහා ක්රීඩක ක්රීඩිකාවන් තෝරාගනු ලබන තීරණාත්මක “ඔලිම්පික් Q-මාලාව” (Olympic Qualifier Series) සඳහා සත්කාරකත්වය සපයන නගරයක් ලෙස චීනයේ ශැංහයි නගරය යළිත් තෝරාගෙන තිබේ. ජාත්යන්තර ඔලිම්පික් කමිටුව (IOC) ඊයේ (07) නිල වශයෙන් නිවේදනය කළේ 2024 වසරේදී මෙම වැඩසටහන සාර්ථකව ආරම්භ කළ ශැංහයි නගරය වෙත 2028 වසරේදී ද එම අවස්ථාව හිමි වන බවයි.
මෙම නවතම තීරණයට අනුව, 2028 මැයි සහ ජූනි මාස අතරතුර ලෝකයේ ප්රධාන නගර හතරකදී ඔලිම්පික් සුදුසුකම් ලැබීමේ තරගාවලි පැවැත්වෙනු ඇත. ජපානයේ ටෝකියෝ, චීනයේ ශැංහයි, කැනඩාවේ මොන්ට්රියල් සහ ඇමෙරිකාවේ ඕලන්දෝ යන නගර එම සුවිශේෂී සත්කාරක නගර ලෙස නම් කර තිබේ. ජාත්යන්තර ඔලිම්පික් කමිටුවේ සභාපතිනි කර්ස්ටි කොවෙන්ට්රි මහත්මිය ප්රකාශ කළේ “Q-Series” යනු ක්රීඩක ක්රීඩිකාවන්ට මෙන්ම ගෝලීය රසිකයන්ට ද ඔලිම්පික් උද්යෝගය සමීප කරවන සුවිශේෂී ගෝලීය ඉසව්වක් වනු ඇති බවයි.
නාගරික ක්රීඩා ඉසව් කෙරෙහි වැඩි අවධානයක් යොමු කරන මෙම තරගාවලිය තුළින් ලොස් ඇන්ජලීස් ඔලිම්පික් උළෙල සඳහා සෘජුවම සුදුසුකම් ලැබීමේ අවස්ථාව ක්රීඩක ක්රීඩිකාවන්ට හිමි වේ. 2024 වසරේදී ශැංහයි සහ බුඩාපෙස්ට් හි පැවැත්වූ තරගාවලි හරහා නාගරික උත්සවශ්රීය සහ ක්රීඩාව එක්තැන් කරමින් ලබාගත් සාර්ථකත්වය මත පදනම්ව මෙම ව්යාපෘතිය තවදුරටත් පුළුල් කිරීමට ඔලිම්පික් කමිටුව පියවර ගෙන ඇත. මෙය LA28 ක්රීඩා උළෙලට යන ගමනේ වඩාත් තීරණාත්මක සහ ආකර්ෂණීයම සන්ධිස්ථානයක් වනු ඇත.
