මෙක්සිකෝ අගනුවරට උතුරින් පිහිටි ඓතිහාසික “සඳ පිරමිඩය” (Pyramid of the Moon) මුදුනේ සිටි සන්නද්ධ පුද්ගලයෙකු එල්ල කළ වෙඩි ප්රහාරවලින් කොලොම්බියානු, රුසියානු සහ කැනේඩියානු ජාතික සංචාරකයන් පිරිසක් තුවාල ලබා තිබේ. තුවාල ලැබූ හය දෙනා අතරින් සිව් දෙනෙකුට වෙඩි වැදී ඇති අතර අනෙක් දෙදෙනා කලබල වී පිරමිඩයෙන් ඇද වැටීමෙන් තුවාල ලබා ඇති බව බලධාරීන් තහවුරු කළහ. වෙඩි තැබීම සිදු කළ පුද්ගලයා පසුව තමාටම වෙඩි තබාගෙන ජීවිතක්ෂයට පත්ව ඇත.
ප්රහාරය සිදුවන අවස්ථාවේදී සංචාරකයන් විශාල පිරිසක් පිරමිඩය මුදුනේ සිට ඇති අතර වෙඩි හඬත් සමඟ ඔවුන් බිම වැතිරෙමින් සහ පිරමිඩයෙන් පහළට දිව යමින් ජීවිතය බේරා ගැනීමට උත්සාහ කර ඇති බව ඇසින් දුටු සාක්ෂිකරුවෝ පවසති. මෙම සිදුවීම පිළිබඳව මෙක්සිකානු ජනාධිපතිනි ක්ලෝඩියා ෂෙයින්බෝම් (Claudia Sheinbaum) මහත්මිය සිය කණගාටුව පළ කර ඇති අතර විධිමත් පරීක්ෂණයක් පවත්වන බවට සහතික වී තිබේ. තියොතිහුවාකන් පිරමිඩ යනු වසරකට මිලියන 1.8කට අධික සංචාරකයන් පිරිසක් පැමිණෙන මෙක්සිකෝවේ අතිශය වැදගත් සංචාරක ස්ථානයක් බැවින් මෙම සිදුවීම එරට ආරක්ෂාව පිළිබඳව දැඩි කතාබහක් මතු කර ඇත.
