දිවයිනේ ප්රදේශ කිහිපයක සිදු වූ බිහිසුණු රිය අනතුරුවලින් පාසල් සිසුවෙකු ඇතුළු පුද්ගලයින් හයදෙනෙකු ජීවිතක්ෂයට පත්ව තිබේ. නිකවැරටිය, නම්මුවාව මාර්ගයේදී ලොරි රථයක ගැටීමෙන් 82 හැවිරිදි පදික කාන්තාවක මියගොස් ඇති අතර, මැල්සිරිපුර, හල්මිල්ලවැව ප්රදේශයේදී පාසල් වෑන් රථයකින් බැස මාර්ගය හරහා ගමන් කළ 11 හැවිරිදි පාසල් සිසුවෙකු ලොරි රථයක ගැටී ජීවිතක්ෂයට පත්ව ඇත. මේ අතර, හික්කඩුව නගරය ආසන්නයේදී කාර් රථයක් පාලනය කර ගත නොහැකිව මාර්ගයෙන් ඉවතට පැන සිදුවූ අනතුරකින් එහි පැමිණි 55 හැවිරිදි රියදුරු මියගොස් තිබේ.
මීට අමතරව, මහඔය ඇහැලගස්පල්ලම ප්රදේශයේදී යතුරුපැදියක් බෝක්කුවක ගැටීමෙන් 19 හැවිරිදි තරුණයෙකු ද, දඹදෙණිය ප්රදේශයේදී යතුරුපැදියක් කාර් රථයක ගැටීමෙන් 18 හැවිරිදි යතුරුපැදිකරුවෙකු ද ජීවිතක්ෂයට පත්ව ඇත. එමෙන්ම අවිස්සාවේල්ල – රත්නපුර මාර්ගයේ මාහින්ගොඩ ප්රදේශයේදී බස් රථයකට යටවීමෙන් 42 හැවිරිදි පදික පුද්ගලයෙකු ද මියගොස් තිබේ. අනතුරුවලට සම්බන්ධ වාහනවල රියදුරන් අත්අඩංගුවට ගෙන ඇති අතර අදාළ පොලිස් ස්ථාන මඟින් වැඩිදුර විමර්ශන ක්රියාත්මකයි.
