ශ්රී ජයවර්ධනපුර විශ්වවිද්යාලයේ මහා ශිෂ්ය සංගමය විසින් කැඳවා තිබූ විශේෂ මාධ්ය හමුවකදී එහි සභාපති ගිහාන් නිරෝෂන් මහතා විශ්වවිද්යාල පද්ධතිය තුළ පවතින උග්ර අර්බුද පිළිබඳව කරුණු අනාවරණය කළේය. පීඨ දහයකින් සමන්විත සිය විශ්වවිද්යාලයේ මේ වන විට නිසි පරිදි ක්රියාත්මක වන්නේ පීඨ දෙක තුනක් පමණක් බව පෙන්වා දුන් සභාපතිවරයා, පාලකයින් සිසුන්ගේ මූලික ගැටලු විසඳීමට අපොහොසත් වී ඇති බවට චෝදනා කළේය. කොළඹ සහ කැළණිය වැනි සෙසු ප්රධාන විශ්වවිද්යාලවල පවතින ගැටලුවලට සාපේක්ෂව ජපුර සිසුන් මුහුණ දෙන අර්බුද මෙතෙක් සමනය වී නොමැති බව ඔහු මෙහිදී අවධාරණය කළේය.
මල්වාන ප්රදේශයේ පිහිටි ඉඩමක් සිසුන්ගේ ප්රයෝජනය සඳහා අත්පත් කර ගැනීම සම්බන්ධයෙන්ද මෙහිදී අදහස් පළ වූ අතර, එම ඉඩම ශිෂ්ය ප්රජාවට ලබා දෙන තෙක් සිය අරගලය අත්නොහරින බව මහා ශිෂ්ය සංගමය පවසයි. චරිත් අබේසිංහ මහතා පෙරටුගාමී ශිෂ්ය සංගම් පිළිබඳව සිදුකළ ප්රකාශයන්ට ද පිළිතුරු ලබා දෙමින් සභාපතිවරයා කියා සිටියේ, වර්තමානයේ රටේ සැබෑ විපක්ෂයේ භූමිකාව ඉටු කරන්නේ තම ශිෂ්ය සංගම් බවයි. විපක්ෂය නිහඬව සිටින පසුබිමක අරගල කරමින් අයිතිවාසිකම් දිනා ගැනීමට ශිෂ්ය ව්යාපාරය පෙරමුණ ගන්නා බවත්, බලධාරීන් මෙම ඉල්ලීම්වලට කඩිනම් විසඳුම් ලබා නොදුනහොත් දැඩි ක්රියාමාර්ග ගැනීමට පසුබට නොවන බවත් ඔහු වැඩිදුරටත් අවධාරණය කළේය.
