චීනයේ ෂැන්හයි නුවරදී පැවැත්වෙන 2026 ලෝක කෘත්රිම බුද්ධි සමුළුවට (WAIC) සමගාමීව පැවැත්වුණු රාජ්ය තාන්ත්රික මට්ටමේ සමුළුව අමතමින් ශ්රී ලංකා ඩිජිටල් ආර්ථික අමාත්යාංශයේ නියෝජ්ය අමාත්ය, ඉංජිනේරු එරංග වීරරත්න මහතා විශේෂ දේශනයක් පවත්වා තිබේ. “දීප්තිමත් අනාගතයක් සඳහා AI හවුල්කාරිත්වය” යන තේමාව යටතේ පැවැත්වුණු මෙම සමුළුවේදී නියෝජ්ය අමාත්යවරයා අවධාරණය කළේ ගෝලීය AI පාලන රාමුව සකස් කිරීමේදී දකුණු අර්ධගෝලයේ සංවර්ධනය වෙමින් පවතින රටවල හඬට ද සමාන අවස්ථාවක් හිමිවිය යුතු බවය. AI තාක්ෂණය දැනටමත් ලොව පුරා රාජ්ය සේවා සහ ආර්ථිකයන් තීරණය කරමින් පවතින බැවින්, නීති රීති සම්පාදනය කරන රටවල් සහ එම නීතිවලට යටත් වන රටවල් අතර පරතරය තවදුරටත් පුළුල් නොවිය යුතු බව හෙතෙම පෙන්වා දුන්නේය.
වගකීම්සහගත AI තාක්ෂණික භාවිතයක් උදෙසා ශ්රී ලංකාව පසුගිය වසර දෙකක කාලය තුළ DIGIECON 2030 ජාතික ඩිජිටල් ආර්ථික වැඩපිළිවෙළ හරහා ශක්තිමත් ඩිජිටල් පදනමක් සහ ස්වෛරී ඩිජිටල් යටිතල පහසුකම් සකස් කර ඇති බව ද නියෝජ්ය අමාත්යවරයා මෙහිදී ප්රකාශ කළේය. ආරක්ෂිත AI සේවාවන් සඳහා පදනම වන ශ්රී ලංකා අනන්ය ඩිජිටල් අනන්යතා (SLUDI) වේදිකාව මේ වන විටත් ස්ථාපිත කර ඇති අතර, නුදුරේදීම පිහිටුවීමට නියමිත ජාතික AI ආයතනය හරහා AI පර්යේෂණ, ආචාරධර්ම සහ ප්රතිපත්ති පිළිබඳ දේශීය ධාරිතාව වර්ධනය කිරීමට පියවර ගන්නා බව හෙතෙම සඳහන් කළේය. රටවල් සතු දත්ත සහ ඩිජිටල් යටිතල පහසුකම් පාලනය කිරීමේ අයිතිය සුරක්ෂිත වන පරිදි ගෝලීය වශයෙන් අන්තර්-ක්රියාකාරී AI පද්ධති සමඟ සම්බන්ධ වීම ශ්රී ලංකාවේ ප්රවේශය බව ද ඔහු වැඩිදුරටත් පැහැදිලි කළේය.
ලොව පුරා විවිධ රටවල ඩිජිටල් අමාත්යවරුන්, කලාපීය රාජ්යතාන්ත්රික නියෝජිතයින් සහ ක්ෂේත්රයේ ප්රමුඛයින් විශාල පිරිසක් සහභාගී වූ මෙම අවස්ථාවට ශ්රී ලංකාව නියෝජනය කරමින් ඩිජිටල් ආර්ථික අමාත්යාංශයේ උපදේශක සුමුදු රත්නායක මහතා ද එක්ව සිටියේය. AI ආරක්ෂාව පිළිබඳ ගෝලීය නීති අර්ථවත් වීමට නම් සංවර්ධනය වෙමින් පවතින රටවලට ඒවා ක්රියාත්මක කිරීමේ තාක්ෂණික ධාරිතාව ලබා දිය යුතු බව දේශපාලන හා තාක්ෂණික විශ්ලේෂකයෝ පෙන්වා දෙති. ඕනෑම නවීන තාක්ෂණික පද්ධතියක අවසාන සාර්ථකත්වය මැනිය යුත්තේ තාක්ෂණික දියුණුවෙන් පමණක් නොව, ඉන් සාමාන්ය ජනතාවගේ ජීවන තත්ත්වය නංවාලන ආකාරයෙන් බවට සමුළුවේදී ප්රකාශ වූ අදහස් ජාත්යන්තර ක්ෂේත්රයේ දැඩි අවධානයට ලක්ව ඇත.
