මිනිස් ශ්රමය ඉවත් කිරීමට නොව, මිනිස් වර්ගයා තවත් ඉහළට ඔසවා තැබීමට කෘත්රිම බුද්ධිය (AI) යොදා ගැනීමේ වැදගත්කම ශ්රී ලංකාව වෙනුවෙන් කම්කරු ඇමැති සහ මුදල් හා ක්රමසම්පාදන නියෝජ්ය ඇමැති ආචාර්ය අනිල් ජයන්ත ප්රනාන්දු මහතා අවධාරණය කළේය. ජිනීවාහි පැවැත්වෙන ජාත්යන්තර කම්කරු සංවිධානයේ (ILO) 114 වැනි වාර්ෂික සැසිවාරය අමතමින් ඔහු මේ බව සඳහන් කළේය.
සාම්ප්රදායික දෘෂ්ටිකෝණයෙන් බැහැරව, AI තාක්ෂණය නිෂ්පාදන ක්රියාවලියේ ඵලදායීතාව සහ වටිනාකම වැඩි කරන උත්ප්රේරකයක් ලෙස භාවිත කළ යුතු බව ඇමැතිවරයා පෙන්වා දුන්නේය. ශ්රී ලංකාව සිය කම්කරු ප්රතිපත්ති තුළින් ගුණාත්මක රැකියා අවස්ථා බිහි කිරීමටත්, සාධාරණ ප්රතිලාභ බෙදීයාම සහ සැමට වඩා හොඳ ජීවිතයක් සහතික කිරීමටත් කැපවී සිටින බව ඔහු වැඩිදුරටත් කියා සිටියේය.
ශ්රී ලංකාවේ වත්මන් තත්ත්වය පිළිබඳව කරුණු දක්වමින් ඇමැතිවරයා පෙන්වා දුන්නේ ශ්රී ලංකාවේ සේවයේ නියුතු ජනගහනයෙන් 22.8%ක් දැනටමත් උත්පාදක කෘත්රිම බුද්ධියට (Generative AI) නිරාවරණය වී ඇති බවයි. මෙම තාක්ෂණික බලපෑම වැඩිපුරම එල්ල වී ඇත්තේ සාම්ප්රදායික කාර්යාලීය රැකියාවලට වන අතර කෘෂිකර්මාන්තය සහ අවිධිමත් අංශ කෙරෙහි බලපෑම අවම බවත් ඔහු පැවසීය. AI තාක්ෂණය නිවැරදිව භාවිත කිරීමෙන් නිෂ්පාදන ක්රියාවලිය වෙනස් කර, සාමාන්ය රැකියා ඉහළ ඵලදායීතාවක් සහිත ආකර්ෂණීය ක්ෂේත්ර බවට පත් කළ හැකි බවත් ඇමැතිවරයා සඳහන් කළේය.
ජනාධිපති අනුර කුමාර දිසානායක මහතාගේ නායකත්වය යටතේ ඩිජිටල් පරිවර්තනය ජාතික ප්රමුඛතාවක් බවට පත් කර ඇති බවත්, ඒ සඳහා වැලඳ ගැනීම, අනුකූල වීම සහ වේගවත් කිරීම යන උපායමාර්ගික කරුණු තුන මත පදනම් වූ මාර්ග සිතියමක් ශ්රී ලංකාව ක්රියාත්මක කරමින් පවතින බවත් ඔහු පැවසීය. සමාජ සාධාරණත්වය, කම්කරු අයිතිවාසිකම් සහ රැකියාවේ ගෞරවය සුරකිමින්, තාක්ෂණය සහ AI මඟින් මෙහෙයවන තිරසර ආර්ථික වර්ධනයක් කරා ශ්රී ලංකාව වේගයෙන් ගමන් කරමින් සිටින බව ඇමැතිවරයා අවධාරණය කළේය.
