පනාගොඩ යුද හමුදා ජනපදයේ ගෘහස්ථ ක්‍රීඩාංගණයේදී පැවැති 2026 ආරක්ෂක සේවා හෑන්ඩ්බෝල් ශූරතාවේ ජයග්‍රහණය තමන්සතු කර ගැනීමට ශ්‍රී ලංකා ගුවන් හමුදා කාන්තා හෑන්ඩ්බෝල් කණ්ඩායම සමත්වූ අතර, ඒ හරහා ආරක්ෂක සේවා ක්‍රීඩා උළෙල තුළ තමන් අත්කරගෙන ඇති අඛණ්ඩ ආධිපත්‍යය මනාව තහවුරු කළේය. ආරක්ෂක සේවා ක්‍රීඩා උළෙලට හෑන්ඩ්බෝල් ක්‍රීඩාව හඳුන්වා දුන් දා සිට අඛණ්ඩව ශූරතා දිනා ගනිමින් කිසිදු කණ්ඩායමකට පරාජය කළ නොහැකි අපරාජිත වාර්තාවක් පවත්වාගෙන යාමට ගුවන් හමුදා කාන්තා ක්‍රීඩිකාවන් සමත්වීම සමස්ත ආයතනයටම ඉමහත් අභිමානයක් ගෙන දෙන්නකි. කෝප්‍රල් එරන්දි ඩබ්ලිව්.පී. මහත්මියගේ මෙහෙයවීම යටතේ තරගාවලිය පුරාම විනයගරුකව, උසස් ක්‍රීඩා කුසලතාවකින් සහ සටන්කාමී ආත්මයකින් යුතුව ක්‍රීඩා කළ ගුවන් කාන්තා කණ්ඩායම සිය ප්‍රතිවාදීන් අභිබවා යමින් මෙම විශිෂ්ට ජයග්‍රහණය වාර්තා කළහ.
මෙම තරගාවලියේදී දක්වන ලද දස්කම් අගයමින් ප්‍රමුඛ ගුවන් කාන්තා නවංජනා ආර්.ඒ.එස්.එන්. මහත්මිය තරගාවලියේ දක්ෂතම ක්‍රීඩිකාව ලෙස සම්මාන දිනාගත් අතර, කෝප්‍රල් නිර්මානි ඒ.පී.ආර්. මහත්මිය දක්ෂතම ආරක්ෂක ක්‍රීඩිකාවට හිමි සම්මානය දිනාගනිමින් ගුවන් හමුදා කණ්ඩායමේ ජයග්‍රහණය තවදුරටත් ඔප්නැංවූහ. ශ්‍රී ලංකා යුද හමුදා අත්පන්දු කමිටුවේ සභාපති මේජර් ජෙනරාල් රොහාන් මැදගොඩ මහතා ප්‍රධාන ආරාධිත අමුත්තා ලෙස සහභාගී වූ මෙම අවස්ථාවට ගුවන් ඉංජිනේරු අධ්‍යක්ෂ මණ්ඩලයේ පිරිස් හා සැලසුම් අධ්‍යක්ෂ එයාර් කොමඩෝර් උදිත පියසේන සහ ගුවන් හමුදා අත්පන්දු සභාපති එයාර් කොමඩෝර් බුද්ධික පියසිරි යන මහත්වරුන් ඇතුළු ත්‍රිවිධ හමුදාවේ ජ්‍යෙෂ්ඨ නිලධාරීහු රැසක් එක්ව සිටියහ. ත්‍රිවිධ හමුදා සාමාජිකයන් අතර අන්‍යෝන්‍ය සුහදතාව, ක්‍රීඩාශීලීත්වය සහ එකමුතුකම වර්ධනය කරලීම සඳහා මෙවැනි ක්‍රීඩා තරගාවලි ඉටුකරන මෙහෙවර මෙහිදී විශේෂයෙන් ඇගයීමට ලක් කෙරිණි.
අඛණ්ඩව හත්වැනි වරටත් මෙම කිරුළ හිමිකම තහවුරු කරගැනීම හරහා ගුවන් හමුදා ක්‍රීඩා අංශයේ අඛණ්ඩ සංවර්ධනය, ඔරොත්තු දීමේ හැකියාව සහ ක්‍රීඩිකාවන්ගේ දැඩි කැපවීම මනාව පැහැදිලි වන අතර, එය ඉදිරි ජාතික හා ජාත්‍යන්තර මට්ටමේ ක්‍රීඩා ඉලක්ක ජයග්‍රහණය කිරීම සඳහා මහත් රුකුලක් වනු ඇත. ක්‍රීඩාවේ විශිෂ්ටත්වය අඛණ්ඩව පවත්වාගෙන යමින් අනාගතයේදී ද මෙවැනි ජයග්‍රහණ රැසක් රටට දිනා දීමට ගුවන් හමුදා ක්‍රීඩක ක්‍රීඩිකාවන් සමත් වනු ඇති බවට මෙහිදී ඉමහත් අපේක්ෂා පළ විය.
