ශ්රී ලංකාව සහ කියුබාව අතර සෞඛ්ය ක්ෂේත්රය ඇතුළු ද්විපාර්ශ්වික සබඳතා ශක්තිමත් කිරීම අරමුණු කරගනිමින් විශේෂ සාකච්ඡාවක් සෞඛ්ය හා ජනමාධ්ය අමාත්ය වෛද්ය නලින්ද ජයතිස්ස මහතා සහ ශ්රී ලංකාවේ කියුබානු තානාපතිනි පැට්රීෂියා ලාසාරා පෙගෝ ගුවේරා මහත්මිය අතර සෞඛ්ය අමාත්යාංශයේ දී පැවැත්විණි.
දෙරට අතර පවතින දිගුකාලීන මිත්රත්වය සහ සබඳතා තවදුරටත් වර්ධනය කර ගැනීමේ වැදගත්කම පිළිබඳව මෙහිදී අමාත්යවරයා අවධාරණය කළේය. කියුබාව සතු දියුණු මහජන සෞඛ්ය පද්ධතිය සහ ජෛව තාක්ෂණික (Biotechnology) දැනුම, ශ්රී ලංකාවේ සෞඛ්ය ක්ෂේත්රය නංවාලීම සඳහා පෙරදී ලබා දුන් සහය අගය කළ අමාත්යවරයා, මෙරට වත්මන් සෞඛ්ය ක්ෂේත්රයේ ප්රගතිය සහ ඉදිරි සැලසුම් පිළිබඳව තානාපතිනිය දැනුවත් කළේය.
තානාපතිනි පැට්රීෂියා ලාසාරා ගුවේරා මහත්මිය අදහස් දක්වමින්, මදුරු පාලනය සහ ඩෙංගු රෝගය තුරන් කිරීම සඳහා කියුබානු විශේෂඥ දැනුම ලබාදීම, ඖෂධ සහ එන්නත් නිෂ්පාදනය, මෙන්ම ශ්රී ලංකාවේ සිසුන් සඳහා කියුබාවේ වෛද්ය අධ්යාපන ශිෂ්යත්ව ලබාදීම වැනි ක්ෂේත්රවල නව ප්රවේශයන් පිළිබඳව දීර්ඝව කරුණු දැක්වීය. විශේෂයෙන්ම කොවිඩ්-19 සමයේ කියුබාව නිපදවූ ‘Abdala’ එන්නත වැනි වෛද්ය ජයග්රහණ පදනම් කරගනිමින්, ඉදිරියේදී එන්නත් නිෂ්පාදන ක්ෂේත්රයේ සහයෝගීතාව වර්ධනය කර ගැනීමේ හැකියාව පිළිබඳව ද මෙහිදී සාකච්ඡා කෙරිණි.
මීට අමතරව, සෞඛ්ය සේවා, ක්රීඩා, කෘෂිකර්මාන්ත සහ දේශගුණික විපර්යාස වැනි ක්ෂේත්රවල සහයෝගීතාව තවදුරටත් ශක්තිමත් කිරීමට දෙපාර්ශ්වය එකඟ විය. මෙම හමුවේදී තානාපතිනිය විසින්, ආපදා සහ හදිසි අවස්ථාවන්හිදී රෝගීන් වෙත ප්රතිකාර සහ රෝග විනිශ්චය සඳහා වෛද්ය උපකරණ අඩංගු විශේෂිත ගමන් මල්ලක් අමාත්යවරයා වෙත හඳුන්වා දෙනු ලැබීය.
