ශ්රී ලංකාව සහ තායිලන්තය අතර අධ්යාපනික හා තාක්ෂණික සබඳතා වර්ධනය කර ගැනීම පිළිබඳ විශේෂ සාකච්ඡාවක් තායිලන්තයේදී පවත්වා තිබේ. ශ්රී ලංකාවේ ග්රාමීය සංවර්ධන, සමාජ ආරක්ෂණ සහ ප්රජා සවිබල ගැන්වීමේ අමාත්ය ආචාර්ය උපාලි පන්නිලගේ මහතාගේ තායිලන්ත නිල සංචාරයේ කොටසක් ලෙස මෙම හමුව සිදුවූ බව තායිලන්තයේ ශ්රී ලංකා තානාපති කාර්යාලය නිවේදනය කරයි.
මෙහිදී අමාත්යවරයා ඇතුළු නියෝජිත පිරිස තායිලන්තයේ සුප්රකට ‘චිත්රලදා තාක්ෂණ ආයතනය’ (Chitralada Technology Institute) වෙත ගොස් එහි සභාපතිනි සහ විද්වත් මණ්ඩලය සමඟ සාකච්ඡා පවත්වන ලදී. මෙම සාකච්ඡාවලදී ප්රධාන වශයෙන් තායිලන්තයේ ‘ප්රමාණවත් ආර්ථික දර්ශනය’ (Sufficiency Economy Philosophy) අධ්යාපන පද්ධතියට ගළපා ගන්නා ආකාරය කෙරෙහි අවධානය යොමු විය. මීට අමතරව නව්ය කෘෂිකර්මාන්තය, කාර්මික තාක්ෂණය, ව්යාපාර පරිපාලනය සහ ඩිජිටල් තාක්ෂණය වැනි ක්ෂේත්ර පිළිබඳව ද දෙරටේ අවධානය යොමු වී තිබේ.
අමාත්ය උපාලි පන්නිලගේ මහතා මෙහිදී ප්රකාශ කළේ, ග්රාමීය සංවර්ධනය සහ කුසලතා මත පදනම් වූ අධ්යාපනය ශ්රී ලංකාවේ වත්මන් ප්රමුඛතාවක් බවයි. තායිලන්තයේ පවතින සාර්ථක තාක්ෂණික අධ්යාපන ආකෘති ශ්රී ලංකාවට උචිත පරිදි සකස් කර ගැනීමට ඇති උනන්දුව ද අමාත්යවරයා මෙහිදී අවධාරණය කළේය. තායිලන්තයේ ශ්රී ලංකා තානාපතිනි විජයන්ති එදිරිසිංහ මහත්මිය ද මෙම අවස්ථාවට සහභාගී වූ අතර, දෙරට අතර ආයතනික හවුල්කාරිත්වයන් ශක්තිමත් කිරීම තිරසර සංවර්ධනයට ඉවහල් වන බව ඇය පෙන්වා දුන්නාය.
