බේරාගැනීම්, පුනරුත්ථාපන සහ වස්තුභංගත්ව (ආයතනික සහ පුද්ගලික) පනත් කෙටුම්පත රජයේ මුදල් පිළිබඳ කාරක සභාව විසින් පසුගියදා අනුමත කරන ලදී. පාර්ලිමේන්තු මන්ත්රී ආචාර්ය හර්ෂ ද සිල්වා මහතාගේ සභාපතිත්වයෙන් පසුගිය 28 වනදා රැස්වූ කාරක සභාවේදී මෙම තීරණය ගෙන ඇත.
පුද්ගලයන් සහ සමාගම් බේරා ගැනීම, පුනරුත්ථාපනය කිරීම සහ වස්තුභංගත්වයට අදාළ නීති සංශෝධනය කිරීම හා ඒකාබද්ධ කිරීම මෙහි ප්රධාන අරමුණයි. මේ හරහා (97 වන අධිකාරය වූ) වස්තුභංගත්ව ආඥාපනත ඉවත් කෙරෙන අතර 2007 අංක 07 දරන සමාගම් පනත, 2017 අංක 24 දරන දේශීය ආදායම් පනත සහ 1988 අංක 72 දරන සමථ මණ්ඩල පනත ද සංශෝධනය කිරීමට නියමිතය. වෘත්තීය ප්රමිතීන් සහ අධීක්ෂණ කටයුතු සහතික කිරීම සඳහා “වස්තුභංගත්ව නියාමන අධිකාරිය” ස්ථාපිත කිරීමට ප්රතිපාදන සලසා ඇත.
ණයගැතියා පුනරුත්ථාපනය සඳහා සූදානම් වන කාලය තුළ ණය හිමියාගේ බලාත්මක කිරීමේ ක්රියාමාර්ග අත්හිටුවන තාවකාලික දින 60ක සහන කාලයක් හඳුන්වා දී තිබේ. මූල්යමය වශයෙන් පීඩාවට පත්ව සිටින නමුත් ගෙවීමේ හැකියාව ඇති ව්යාපාර බේරා ගැනීම හෝ ප්රතිව්යුහගත කිරීම සඳහා “පරිපාලන” ක්රියා පටිපාටියක් හඳුන්වා දෙනු ලැබේ. සීමිත ආදායම් සහ වත්කම් සහිත ණයගැතියන් සඳහා සරල, වේගවත් සහ අඩු වියදම් සහිත නඩු කටයුතු සඳහා පහසුකම් සැලසීම මෙහි තවත් විශේෂත්වයකි. ක්ෂුද්ර, කුඩා හා මධ්ය පරිමාණ ව්යාපාර (MSME) සඳහා ප්රතිව්යුහගත කිරීමේ ක්රියාපටිපාටිය වඩාත් සරල හා ලාභදායී වන පරිදි සකස් කර ඇත.
ණය හිමියන් ආරක්ෂා කිරීමේ අරමුණින් වැරදි සහගත වෙළඳාම සහ වංචනික ගනුදෙනු වැළැක්වීමේ නීති ද මීට අන්තර්ගතය. මෙම කෙටුම්පත ලෝක බැංකු හවුල්කාරිත්වය සහ ජාත්යන්තර වෙළඳ නීතිය පිළිබඳ එක්සත් ජාතීන්ගේ කොමිසම (UNCITRAL) විසින් ප්රවර්ධනය කරන ලද ජාත්යන්තර ප්රමිතීන්ට අනුකූලව සම්පාදනය කර තිබේ. පෞද්ගලික අංශයේ සහ සිවිල් සමාජයේ පාර්ශවකරුවන්ගේ අදහස් ද මෙහිදී සලකා බලා ඇති අතර පනත සම්මත වූ පසු එය ප්රායෝගිකව ක්රියාත්මක කිරීමේ වගකීම නිලධාරීන් සතු වන බව කාරක සභා සභාපතිවරයා අවධාරණය කළේය.
