මුලතිව් දිස්ත්‍රික්කයේ කෙප්පාපිලව් ප්‍රදේශයේ ආරක්ෂක හමුදා භාවිතයේ පැවති අක්කර 6.97ක පමණ ඉඩම් ප්‍රමාණයක් ජනතා භාවිතය සඳහා නිදහස් කර තිබේ.
ශ්‍රී ලංකා යුද හමුදාව සඳහන් කළේ, එම ඉඩම් පසුගිය 21 වැනිදා ශ්‍රී ලංකා යුද හමුදාවේ 59 වන සේනාංකයේ නිලධාරීන් විසින් මරිටයිම්පත්තු ප්‍රාදේශීය ලේකම්වරයා වෙත නිල වශයෙන් භාර දුන් බවයි.
මුලතිව් දිස්ත්‍රික් ලේකම් හා රජයේ නියෝජිත ඒ. උමාමහේෂ්වරන් මහතාගේ සහභාගීත්වයෙන් මෙම ඉඩම් භාරදීම සිදුකර තිබේ.
ජාතික ආරක්ෂාව සඳහා අත්‍යවශ්‍ය වන ඉඩම් හැර, ආරක්ෂක හමුදා භාවිතයේ පවතින ඉඩම් ක්‍රමානුකූලව නිදහස් කිරීමේ රජයේ ප්‍රතිපත්තියට අනුව මෙම පියවර ගෙන ඇති බව යුද හමුදාව සඳහන් කළේය. එම ප්‍රතිපත්තියේ අරමුණ වන්නේ අදාළ ඉඩම් ඒවායේ නීත්‍යනුකූල හිමිකරුවන් වෙත නැවත ලබාදීම සහ ජනතා භාවිතයට අවස්ථාව සැලසීමයි.
මෙම ඉඩම් නිදහස් කිරීම සඳහා සහයෝගය ලබාදීම සම්බන්ධයෙන් ආරක්ෂක අමාත්‍යාංශය, ශ්‍රී ලංකා යුද හමුදාව, 59 වන සේනාංකයේ සේනාංකාධිපතිවරයා, ආරක්ෂක අංශ සහ අදාළ රාජ්‍ය නිලධාරීන් වෙත මුලතිව් දිස්ත්‍රික් ලේකම්වරයා සිය ප්‍රශංසාව පළ කර තිබේ.
