රජය විසින් මෑතකදී ගැසට් කර පාර්ලිමේන්තුවට ඉදිරිපත් කර ඇති ‘රාජ්‍යය ත්‍රස්තවාදයෙන් ආරක්ෂා කිරීමේ පනත් කෙටුම්පත (PSTA)’ සහ ‘සංවිධානාත්මක අපරාධ වැළැක්වීමේ පනත් කෙටුම්පත (OCB)’ සම්බන්ධයෙන් ශ්‍රී ලංකා නීතිඥ සංගමය සිය දැඩි කනස්සල්ල සහ විරෝධය පළ කර තිබේ.
නීතිඥ සංගමයේ සභාපති රජීව් අමරසූරිය සහ ලේකම් නලින් ද සිල්වා යන මහත්වරුන්ගේ අත්සනින් යුතුව නිකුත් කර ඇති මෙම නිවේදනය මඟින් පෙන්වා දී ඇත්තේ, මෙම පනත් මඟින් විධායකයට අධික බලතල ප්‍රදානය කෙරෙන අතර පුද්ගල නිදහස සහ අධිකරණ අධීක්ෂණය දැඩි ලෙස සීමා වන බවයි. අනිවාර්ය රිමාන්ඩ් කිරීම්, දැඩි ඇප කොන්දේසි සහ මූලික අයිතිවාසිකම් උල්ලංඝනය වීම් හේතුවෙන් PSTA පනත් කෙටුම්පතට එරෙහිව ශ්‍රේෂ්ඨාධිකරණය හමුවේ පෙත්සමක් ගොනු කර ඇති බවත්, කිසිදු මහජන උපදේශනයකින් තොරව හඳුන්වා දී ඇති OCB පනත් කෙටුම්පත වහා ඉවත් කර ගන්නා ලෙස නීතිඥ සංගමය රජයෙන් ඉල්ලා සිටින බවත් එහි සඳහන් වේ.
