ශ්රී ලංකාවට සෘජු විදේශ ආයෝජන ආකර්ෂණය කර ගැනීමේ උපායමාර්ගික ප්රවේශයන් ශක්තිමත් කිරීම අරමුණු කරගනිමින්, ශ්රී ලංකා ආයෝජන මණ්ඩලය (BOI) සහ ඕස්ට්රේලියානු වෙළඳ හා ආයෝජන කොමිසම (Austrade) අතර විශේෂ දැනුම බෙදා ගැනීමේ වැඩමුළුවක් සාර්ථකව පවත්වා තිබේ. ශ්රී ලංකාව සහ ඕස්ට්රේලියාව අතර ද්විපාර්ශ්වික වෙළඳ සහ ආයෝජන පහසුකම් සැපයීමේ ගිවිසුමේ (TIFA) ක්රියාකාරී සැලැස්ම යටතේ ක්රියාත්මක වූ මෙම වැඩසටහන, ගෝලීය තරඟකාරී ආර්ථික පසුබිමක් තුළ මෙරට ආයෝජන විභවය නිසි ලෙස ඔප්නැංවීම කෙරෙහි සුවිශේෂී අවධානයක් යොමු කර ඇත.
ආයෝජන මණ්ඩලයේ සභාපති දුමින්ද හුලංගමුව සහ ඕස්ට්රේලියානු මහ කොමසාරිස් මැතිව් ඩක්වර්ත් යන මහත්වරුන්ගේ ප්රධානත්වයෙන් පැවැති මෙම සැසිවාරයේදී, රටෙහි දක්ෂ ශ්රම බලකාය සහ උපායමාර්ගික පිහිටීම උපයෝගී කරගනිමින් ජාත්යන්තර ප්රමිතීන්ට අනුකූලව ආයෝජකයන් ආකර්ෂණය කර ගැනීමේ ක්රමවේද පිළිබඳව පුළුල් ලෙස සාකච්ඡා කර ඇත. ඔස්ට්රේඩ් හි වෙළඳ හා ආයෝජන කොමසාරිස් ඇන්ඩෲ කාටර් ඇතුළු විශේෂඥයන් විසින් ආංශික ඉලක්කගත කිරීම්, ආයෝජක ජීවන චක්ර කළමනාකරණය, ඩිජිටල් සක්රීයකරණය සහ අන්තර් ආයතන සම්බන්ධීකරණ රාමු සම්බන්ධයෙන් හොඳම භාවිතයන් මෙහිදී අනාවරණය කරන ලදී.
මෙම වැඩමුළුව හරහා ලැබුණු වටිනා අත්දැකීම් සහ තාක්ෂණික දැනුම ඉදිරියේදී ශ්රී ලංකාවේ ඛනිජ සහ අධ්යාපන වැනි ප්රමුඛතා අංශ වෙත ගුණාත්මක ආයෝජන ගෙන ඒමටත්, ආයෝජන මණ්ඩලයේ ආයතනික ධාරිතාව ඉහළ නංවා ගැනීමටත් ඉමහත් රුකුලක් වනු ඇත. දේශීය ආර්ථිකය ස්ථාවර කරමින් සහ ජාත්යන්තර විශ්වාසය තහවුරු කරමින් ක්රියාත්මක වන මෙවැනි ද්විපාර්ශ්වික හවුල්කාරීත්වයන් හරහා මෙරට විදේශ ආයෝජන ක්ෂේත්රයේ නව පිබිදීමක් ඇති කිරීමට අවශ්ය ශක්තිමත් පසුබිම නිර්මාණය වෙමින් පවතී.
