ගෝලීය භූ-දේශපාලනික නොසන්සුන්තාව හමුවේ ආයෝජකයින් දක්වන මන්දගාමී උනන්දුව හේතුවෙන්, ද්විතීයික ස්කන්ධ වෙළෙඳපොළේ (Secondary Market) ගනුදෙනු ප්රමාණය ඊයේ (23) ඉතා අවම මට්ටමක පැවති බව ‘First Capital Research’ ආයතනය පවසයි. සතිය පුරාම දක්නට ලැබුණු මෙම අහිතකර තත්ත්වය ඊයේ දිනයේදී ද වෙළෙඳපොළේ කැපී පෙනෙන ලක්ෂණයක් විය. ඊයේ දිනයේදී සීමිත ගනුදෙනු ප්රමාණයක් වාර්තා වූ අතර, ඒවා ප්රධාන වශයෙන් කෙටි කාලීන බැඳුම්කර කෙරෙහි අවධානය යොමු කර තිබුණි. ඒ අනුව 2026.12.15 දින කල්පිරෙන බැඳුම්කරය 8.70% ක අනුපාතයකට ගනුදෙනු වූ අතර 2027.05.01 දින කල්පිරෙන බැඳුම්කරය 8.89% ක මට්ටමක පැවතුණි.
විදේශ විනිමය වෙළෙඳපොළ දෙස බැලීමේදී, එක්සත් ජනපද ඩොලරයට සාපේක්ෂව ශ්රී ලංකා රුපියල සුළු වශයෙන් අවප්රමාණය වී ඇත. බදාදා දිනයේදී රුපියල් 316.46 ක්ව පැවති ඩොලරයේ අගය ඊයේ වන විට රුපියල් 316.78 ක් ලෙස වාර්තා විය. කෙසේ වෙතත්, බැංකු පද්ධතියේ ද්රවශීලතාව රුපියල් බිලියන 151.01 සිට රුපියල් බිලියන 167.46 දක්වා වර්ධනය වී ඇති බව දත්ත වාර්තා පෙන්වා දෙයි.
