ලබන වසර සඳහා රුපියල් බිලියන 2,000ක (රුපියල් ට්රිලියන 2ක) අතිවිශාල මුදලක් ප්රාග්ධන වියදම් වෙනුවෙන් වෙන් කිරීමට රජය සැලසුම් කර ඇති බව සෞඛ්ය හා ජනමාධ්ය අමාත්ය ආචාර්ය නලින්ද ජයතිස්ස මහතා ප්රකාශ කළේය. මෙම වසරේදී (2026) රජය විසින් ප්රාග්ධන වියදම ලෙස රුපියල් බිලියන 1,350ක් වෙන් කර තිබේ.
කළුතර දිස්ත්රික්කයේ ග්රාමීය මාර්ග 14ක් කාපට් අතුරා සංවර්ධනය කිරීමේ ව්යාපෘතියක් ආරම්භ කිරීමේ අවස්ථාවට සහභාගී වෙමින් අමාත්යවරයා මේ බව සඳහන් කළේය. ආසියානු සංවර්ධන බැංකුවේ (ADB) සහ ශ්රී ලංකා රජයේ මූල්ය දායකත්වයෙන් ක්රියාත්මක වන ඒකාබද්ධ මාර්ග ආයෝජන වැඩසටහන (iRoad) යටතේ මෙම මාර්ග සංවර්ධනය කෙරේ.
කළුතර දිස්ත්රික්කයේ සංවර්ධන කටයුතු පිළිබඳව අමාත්යවරයා වැඩිදුරටත් දැක්වූ කරුණු පහත පරිදි වේ.
මේ වසරේ කළුතර දිස්ත්රික්කයේ ග්රාමීය මාර්ග සංවර්ධනය සඳහා පළාත් සභා සහ මධ්යම රජයේ අරමුදල් යටතේ රුපියල් මිලියන 550ක ව්යාපෘති සඳහා අනුමැතිය ලැබී ඇත. ඊට අමතරව කළුතර දිස්ත්රික්කයේ පාලම් සහ කාණු පද්ධති සංවර්ධනය සඳහා රුපියල් මිලියන 100ක් වෙන් කර ඇති අතර, සමස්තයක් ලෙස දිස්ත්රික්කයේ මාර්ග සහ යටිතල පහසුකම් සංවර්ධනය සඳහා රුපියල් බිලියන 2ක පමණ මුදලක් වෙන් කර තිබේ.
පසුගිය වසරවල රාජ්ය ආදායම කැපී පෙනෙන ලෙස ඉහළ ගොස් ඇති බවත්, 2025 වසරේදී රජයේ සමස්ත ආදායම රුපියල් බිලියන 5,500ක් දක්වා වර්ධනය වූ බවත් අමාත්යවරයා පැවසීය. මීට අමතරව, පසුගිය වසරේ රටේ ඉහළම අපනයන ආදායම වාර්තා වූ බවත්, විදේශ ප්රේෂණ ඉහළ ගොස් ඇති අතර සංචාරක ක්ෂේත්රයද ක්රමයෙන් දියුණු වෙමින් පවතින බවත් ඔහු වැඩිදුරටත් සඳහන් කළේය.
