සිගරට් සඳහා අඩු බදු ප්රතිශතයක් පවත්වාගෙන යාම හේතුවෙන් ජාතික භාණ්ඩාගාරයට සිදුවන දැවැන්ත මූල්ය පාඩුව වළක්වා ගැනීම සඳහා ගත යුතු ප්රතිපත්තිමය විසඳුම ඉතා සරල සහ එක රැයකින් ක්රියාවට නැංවිය හැකි එකක් බව වේරිටේ රිසර්ච් (Verité Research) ආයතනය පෙන්වා දෙයි. සිගරට් බදුකරණය ප්රධාන වශයෙන්ම විශේෂ සුරාබදු (Excise Duties) මත පදනම් වන බැවින්, එහි බදු ප්රතිශතය නැවතත් 75% ජාත්යන්තර මට්ටමට ඔසවා තැබීම සඳහා අලුතින් පනත් සම්මත කිරීමක් හෝ පාර්ලිමේන්තු අනුමැතියක් (Parliamentary Approval) අවශ්ය නොවන බව එම ආර්ථික විශ්ලේෂණ වාර්තාවල සඳහන් වේ.
මෙම බදු සංශෝධනය සිදු කිරීමේ පූර්ණ නිල බලය පවතින්නේ මුදල් අමාත්යවරයා (වත්මන් ජනාධිපතිවරයා) සතුව වන අතර, තනි දිනක් ඇතුළත නිල ගැසට් නිවේදනයක් (Gazette Notice) ප්රකාශයට පත් කිරීමෙන් පමණක් මෙම ප්රතිපත්තිය සෘජුවම බලාත්මක කළ හැකිය. සිගරට් පරිභෝජනය 2025 මට්ටමේම පැවතිය ද, සිල්ලර මිල වෙනස් නොකර මෙම සුරාබද්ද නිසි පරිදි සංශෝධනය කළහොත් පමණක් රජයට වසරකට අමතරව රුපියල් බිලියන 17.3ක (රුපියල් කෝටි 1,730ක) ස්ථාවර වාර්ෂික ආදායමක් උපයාගත හැකි අතර, ඉදිරියේදී දුම්කොළ සමාගම විසින් මිල ගණන් පාරිභෝගිකයා මත පටවමින් මිල වැඩි කරන සෑම අවස්ථාවකදීම රජයේ ආදායම තවදුරටත් ඉහළ යනු ඇත.
ලෝක සෞඛ්ය සංවිධානයේ දුම්කොළ පාලනය පිළිබඳ ප්රඥප්තියේ (WHO FCTC) 6 වන වගන්තියට අනුව උද්ධමනයට සාපේක්ෂව බදු වැඩි කිරීමට ශ්රී ලංකාව දී ඇති ජාත්යන්තර පොරොන්දුව ඉටු කිරීමට ද මෙමඟින් අවකාශය සැලසේ. දුම්කොළ මාෆියාවෙන් අයකර ගන්නා මෙම අමතර රුපියල් කෝටි 1,730ක ධනස්කන්ධය, දැනට දැඩි මූල්ය හිඟයකින් පෙළෙන ආපදා කළමනාකරණ අමාත්යාංශයේ වාර්ෂික අයවැය මෙන් 1.2 ගුණයකට මෙන්ම ජාතික පෝෂණ ප්රතිපාදන මෙන් 1.3 ගුණයකට සමාන වන බැවින්, එමඟින් අත්යවශ්ය සමාජ සුභසාධන කටයුතු පුළුල් කිරීමට හෝ ජනතාව පීඩාවට පත් කර ඇති අත්යවශ්ය මූලික ආහාර ද්රව්ය මත පනවා ඇති අනෙකුත් වක්ර බදු ප්රතිශතයන් සැලකිය යුතු මට්ටමකින් පහත හෙළීමට රජයට කදිම අවස්ථාවක් උදාවන බව වේරිටේ රිසර්ච් ආයතනය වැඩිදුරටත් අවධාරණය කරයි.
