ශ්රී ලංකාවේ අඩු ආදායම්ලාභී නාගරික පවුල්වල නිවාස සිහිනය සැබෑ කරමින්, චීන රජයේ පූර්ණ මූල්ය ආධාර යටතේ කොළඹ දිස්ත්රික්කයේ ක්රියාත්මක වන සහනදායී නිවාස ව්යාපෘතියේ මහරගම පරිශ්රයේ ප්රධාන ව්යුහය (Structure) ඉදිකර අවසන් කිරීමේ සුවිශේෂී සන්ධිස්ථානය චයිනා හාබර් ඉංජිනේරු සමාගම (CHEC) විසින් පසුගියදා සනිටුහන් කර තිබේ.
මෙම සමස්ත යෝධ නිවාස සංවර්ධන ව්යාපෘතිය නිවාස ඒකක 1,996 කින් සමන්විත වන අතර, ඉන් මහරගම කලාපය යටතේ ඉදිකෙරෙන නිවාස 112ක ප්රධාන කොන්ක්රීට් ව්යුහය ඉදිකිරීමේ කටයුතු මෙලෙස සාර්ථකව නිම කර ඇත. චීන රජයේ ‘එක් තීරයක් – එක් මාවතක්’ (Belt and Road Initiative) සංකල්පයට සමගාමීව ලැබුණු ප්රතිපාදන මත ක්රියාත්මක වන මෙම ව්යාපෘතියේ මූලිකම අරමුණ වන්නේ, කොළඹ සහ තදාසන්න ප්රදේශවල වෙසෙන අඩු ආදායම්ලාභී ජනතාවගේ නාගරික ජීවන තත්ත්වය ඉහළ නැංවීම සහ ගුණාත්මක තත්ත්වයෙන් යුත් ආරක්ෂිත නිවාස උරුම කර දීමයි.
ව්යාපෘතියේ ප්රධාන ඉදිකිරීම් අවසන් වීම නිමිත්තෙන් පැවැති උත්සවයට ව්යාපෘති නියෝජිතයන් සහ දෙරටේම පාර්ශවකරුවන් රැසක් එක්ව සිටි අතර, එහිදී මෙතෙක් ලබා ඇති ප්රගතිය ඉහළ ඇගයීමකට ලක් කෙරුණි. CHEC සමාගම සඳහන් කරන්නේ ප්රධාන ව්යුහය නිම කිරීමත් සමඟ, ඉදිරි කාලසීමාව තුළ නිවාස හිමියන්ට ඒවා කඩිනමින් භාරදීම සඳහා වන අභ්යන්තර නිමවුම් කටයුතු (Finishing Works) සහ යටිතල පහසුකම් සැකසීමේ අවසන් අදියර මේ වන විට ආරම්භ කර ඇති බවයි.
මෙම සුවිශේෂී අවස්ථාව පිළිබඳව අදහස් දක්වමින් චයිනා හාබර් ඉංජිනේරු සමාගමේ (CHEC) කළමනාකාර අධ්යක්ෂ වැන්ග් ගැන්ග් (Wang Gang) මහතා කියා සිටියේ, “මෙම සන්ධිස්ථානය මඟින් පෙන්නුම් කරන්නේ, ශ්රී ලංකාවේ පොදු ප්රජාවට සෘජුවම ප්රතිලාභ ලැබෙන උසස් තත්ත්වයේ යටිතල පහසුකම් නිර්මාණය කිරීමට CHEC සමාගම සතු කැපවීමයි. චීනය සහ ශ්රී ලංකාව අතර පවතින දිගුකාලීන ද්විපාර්ශ්වික සංවර්ධන හවුල්කාරිත්වය තවදුරටත් ශක්තිමත් කරන, අඩු ආදායම්ලාභී පවුල්වල ජීවන තත්ත්වය නංවන මෙවැනි සුවිශේෂී ව්යාපෘතියක ප්රධාන කොටස්කරුවෙකු වීමට ලැබීම පිළිබඳව අප ආඩම්බර වනවා” යනුවෙනි.
