එන්ජින් ඔයිල්, ගියර් ඔයිල්, ලිහිසි තෙල් සහ ග්‍රීස් අලෙවි කරන වෙළෙඳුන්ට එම නිෂ්පාදනවල අදාළ රජයේ ගිවිසුම් අංකය අනිවාර්යයෙන් සඳහන් කළ යුතු බව පාරිභෝගික කටයුතු පිළිබඳ අධිකාරිය දැනුම් දෙයි. එම නීති උල්ලංඝනය කරන පාර්ශ්වයන්ට එරෙහිව නීතිමය ක්‍රියාමාර්ග ගන්නා බවද අධිකාරිය අනතුරු අඟවා තිබේ.
2023 අප්‍රේල් 12 වැනිදා ප්‍රකාශයට පත් කළ අංක 2327/36 දරන අතිවිශේෂ ගැසට් පත්‍රයේ 88 වැනි නියෝගය අනුව, ශ්‍රී ලංකා රජය සමඟ වලංගු ගිවිසුමක් නොමැතිව ලිහිසි තෙල් සහ ග්‍රීස් ආනයනය කිරීම හෝ නිෂ්පාදනය කිරීම තහනම් වේ.
ඒ අනුව, ගබඩා කර ඇති, තොග වශයෙන් තබා ඇති, අලෙවි කරන, ඇසුරුම් කරන හෝ අලෙවිය සඳහා ප්‍රදර්ශනය කරන සෑම ලිහිසි තෙල් හා ග්‍රීස් ඒකකයකම අදාළ රජයේ ගිවිසුම් අංකය සඳහන් කළ යුතුය. එම අංකය නිෂ්පාදන බහාලුමේ, ඇසුරුමේ හෝ ආවරණයේ මුද්‍රණය කර තිබිය යුතු අතර, නැතහොත් තදින් සවි කළ ලේබලයක දැක්විය යුතුය.
මෙම නියමය ආනයනයට හෝ නිෂ්පාදනයට සෘජුව සම්බන්ධ නොවන සිල්ලර වෙළෙඳුන්ටද අදාළ වන බව අධිකාරිය අවධාරණය කරයි. තොග මිලදී ගැනීමට පෙර රජයේ ගිවිසුම් අංකය පරීක්ෂා කිරීම, සැපයුම්කරුවන්ගේ, ආනයනකරුවන්ගේ හෝ නිෂ්පාදකයන්ගේ තොරතුරු ලබාගැනීම සහ මිලදී ගැනීමේ බිල්පත් හා ඉන්වොයිසි සුරක්ෂිතව තබාගැනීම වෙළෙඳුන්ට උපදෙස් දී තිබේ.
වෙළෙඳපොළ පරීක්ෂා කිරීම් සහ විශේෂ වැටලීම් මේ වනවිටත් ක්‍රියාත්මක වන අතර, විමර්ශනවලින් පසු නීති උල්ලංඝනය කරන පාර්ශ්වයන්ට එරෙහිව නීතිමය ක්‍රියාමාර්ග ගන්නා බවද පාරිභෝගික කටයුතු පිළිබඳ අධිකාරිය සඳහන් කරයි.
මේ සම්බන්ධයෙන් පැමිණිලි ඉදිරිපත් කිරීමට පාරිභෝගිකයන්ට 1977 ක්ෂණික දුරකථන අංකය භාවිත කළ හැකිය.
