එක්සත් අරාබි එමීර් රාජ්‍යයට (UAE) සංචාරය කරන හෝ එහි පදිංචිව සිටින ඉන්දීය ජාතිකයන්ට ප්‍රමාණවත් වෛද්‍ය රක්ෂණ ආවරණයක් ලබාගෙන ඇති බව තහවුරු කරගන්නා ලෙස අබුඩාබිහි ඉන්දීය තානාපති කාර්යාලය සහ ඩුබායිහි ඉන්දීය කොන්සල් ජනරාල් කාර්යාලය උපදෙස් දී තිබේ.
මෙම උපදෙස් ඉන්දීය තානාපති කාර්යාලයේ නිල වෙබ් අඩවියේ 2026 ඔක්තෝබර් 26 දින පළ කර ඇත හදිසි රෝගී තත්ත්වයන් සහ වෛද්‍ය හදිසි අවස්ථා හේතුවෙන් විශාල වෛද්‍ය බිල්පත්වලට මුහුණ දුන් ඉන්දීය ජාතිකයන් පිළිබඳ වාර්තා කිහිපයක් ලැබී ඇති බවයි. එම වියදම් ඇතැම් රෝගීන්ට සහ ඔවුන්ගේ පවුල්වලට දරාගත නොහැකි මට්ටමක පැවති බවද සඳහන් වේ.
ප්‍රමාණවත් රක්ෂණ ආවරණයක් නොමැතිවීම එම මූල්‍ය දුෂ්කරතා තවත් වැඩි කිරීමට හේතු වී ඇති බව ඉන්දීය රාජ්‍ය තාන්ත්‍රික දූත මණ්ඩල පෙන්වා දෙයි. ඒ අනුව, සංචාරක හෝ වෙනත් කෙටි කාලීන අවශ්‍යතා සඳහා UAE වෙත යන ඉන්දීය ජාතිකයන් ගමන ආරම්භ කිරීමට පෙර සුදුසු වෛද්‍ය රක්ෂණයක් ලබාගත යුතු බව උපදෙස් දී තිබේ.
එම රක්ෂණ ආවරණයට මුදල් අත්තිකාරම් නොගෙවා ප්‍රතිකාර ලබාගත හැකි පහසුකම් (cashless treatment) සහ හදිසි අවස්ථාවකදී රෝගියා නැවත ඉන්දියාවට ගෙන ඒමේ වියදම්ද ඇතුළත් විය යුතු බව අවධාරණය කර ඇත.
UAE හි රැකියා වීසා මත හෝ යැපෙන්නන් ලෙස පදිංචිව සිටින ඉන්දීය ජාතිකයන්ටද තමන් සතුව පවතින රක්ෂණ ඔප්පු මඟින් UAE හි වෛද්‍ය වියදම් සහ හදිසි වෛද්‍ය ප්‍රවාහනය සඳහා ප්‍රමාණවත් ආවරණයක් ලැබෙනවාද යන්න පරීක්ෂා කර බලන ලෙස දැනුම් දී තිබේ.
