ශ්රී ලංකාවේ බිම් මට්ටමේ පාරිභෝගික සහ මූල්ය ශක්තිය නියෝජනය කරන සමූපකාර ව්යාපාරය, සාම්ප්රදායික ලිපිගොනු ක්රමවේදයෙන් මුදාගෙන නවීන ඩිජිටල් ආර්ථික මූලධර්මවලට අනුගත කිරීමේ උපායමාර්ගික වැඩපිළිවෙළක් රජය විසින් නිල වශයෙන් ප්රකාශයට පත් කර තිබේ. ජාත්යන්තර සමූපකාර දිනයට සමගාමීව, “සමූපකාර සාමාජික ලියාපදිංචිය සඳහා වූ ඩිජිටල් ද්වාරය” එළඹෙන ජූලි 14 වැනිදා ශ්රී ලංකා පදනම් ආයතනයේදී නිල වශයෙන් දියත් කිරීමට සියලු කටයුතු සූදානම් කර ඇති බව වෙළෙඳ, වාණිජ, ආහාර සුරක්ෂිතතා සහ සමූපකාර සංවර්ධන අමාත්ය වසන්ත සමරසිංහ මහතා ප්රකාශ කළේය. මෙම නව පරිවර්තනය හුදෙක් පරිපාලනමය වෙනසකට වඩා, මෙරට සමස්ත ආර්ථිකයේ තීරණාත්මක බලවේගයක් ප්රතිසංවිධානය කිරීමේ මූලෝපායික පියවරක් ලෙස හඳුනාගත හැකිය.
දිවයින පුරා විසිරී සිටින මිලියන 8කට ආසන්න සමූපකාර සාමාජිකයන් පිළිබඳ විධිමත්, විනිවිදභාවයකින් යුත් ජාතික දත්ත පද්ධතියක් ස්ථාපිත කිරීම මෙම ඩිජිටල් ද්වාරයේ ප්රධානතම අරමුණ වන අතර, සියලුම සාමාජිකයන් සඳහා මෙම ලියාපදිංචිය සම්පූර්ණයෙන්ම නොමිලේ සිදු කිරීමට නියමිතය. මෙම දැවැන්ත ඩිජිටල් පරිවර්තනයේ පළමු අදියරෙන් අනතුරුව, ඉදිරියේදී ඩිජිටල් සාමාජික අනන්යතාව, මාර්ගගත සේවා, ඩිජිටල් ගෙවීම් හා මාර්ගගත ඡන්දය ප්රකාශ කිරීමේ ක්රමවේදයන් හඳුනාදීමට රජය අපේක්ෂා කරයි. එමෙන්ම සමූපකාර බැංකු පද්ධතිය ඒකාබද්ධ කරමින් සැපයුම්දාම හා ප්රසම්පාදන ක්රියාවලිය ද මෙම ජාතික දත්ත වේදිකාවට සම්බන්ධ කිරීම හරහා පාරිභෝගිකයන්ට මෙන්ම නිෂ්පාදකයන්ට ද අතරමැදියන්ගෙන් තොරව සෘජු ආර්ථික ප්රතිලාභ හිමිකර දීමට සැලසුම් කර ඇත.
සමූපකාර සංවර්ධන කොමසාරිස් තරණි කුමාරදාස මහත්මිය ඇතුළු ඉහළ නිලධාරීන්ගේ අධීක්ෂණය යටතේ ක්රියාත්මක වන මෙම වැඩපිළිවෙළ, මෙරට ආර්ථිකයේ තෙවන කුළුණ බවට සමූපකාර ක්ෂේත්රය පත් කිරීමේ රාජ්ය ප්රතිපත්තිය ශක්තිමත් කරන ප්රධානතම සාධකයකි. මෙම ඩිජිටල්කරණය හරහා ග්රාමීය මට්ටමේ පවතින සම්පත් හා නිෂ්පාදන සෘජුවම ජාතික වෙළෙඳපොළ ජාලය සමඟ බද්ධ වන බැවින්, රටේ ආහාර සුරක්ෂිතතාව තහවුරු කිරීමටත්, ජීවන වියදම් පාලනය කිරීමටත් සුවිශේෂී පිටුවහලක් ලැබෙනු ඇත. තාක්ෂණික මෙවලම් උපයෝගී කරගනිමින් සමූපකාර ව්යාපාරය සතු දේපළ සහ මූල්ය පද්ධතිය වඩාත් කාර්යක්ෂම කිරීම, ඉදිරි දශකය තුළ ශ්රී ලංකාවේ තිරසාර ආර්ථික සංවර්ධනය සහ සමාජ සාධාරණත්වය උදෙසා තබනු ලබන තීරණාත්මක පියවරක් වනු නොඅනුමානය.
